ශ්‍රී ලංකා නිදහස් පක්ෂයේ ජ්‍යෙෂ්ඨ උපසභාපති තනතුරින් අමාත්‍ය මහින්ද අමරවීර ඉවත්කර තිබෙනවා.
එමෙන්ම පක්ෂයේ ජාතික සංවිධායක ධූරය දැරූ දුමින්ද දිසානායක එම තනතුරින් ඉවත්කර ඇති අතර, භාණ්ඩාගාරික ධූරය දැරූ ලසන්ත අලගියවන්න ද අදාළ තනතුරින් ඉවත්කර ඇති බවයි වාර්තා වන්නේ.
ඔවුන්ට අදාළ තනතුරුවලින් ඉවත්වන ලෙස යෝජනාව පක්ෂ සභාපති හිටපු ජනාධිපති මෛත්‍රීපාල සිරිසේන විසින් අද (30) දිනයේ පැවති පක්ෂයේ විධායක සභා රැස්වීමේ දී ඉදිරිපත් කර තිබෙනවා.
පක්ෂයේ විධායක සභාවේ සියලුදෙනා එම යෝජනාව ඒකමතිකව ස්ථිර කර ඇති බවයි වාර්තා වන්නේ.
පුරප්පාඩු වූ එම තනතුරු සඳහා වෙනත් තිදෙනෙක් පත්කර ඇති බවයි දේශපාලන ආරංචි මාර්ග සඳහන් කළේ.
ඒ, අනුව ජාතික සංවිධායක ධුරයට මහියංගණය ආසන සංවිධායක කේ.පී ගුණවර්ධන ද, භාණ්ඩාගාරික ධුරයට හෙක්ටර් බෙත්මගේ සහ ජ්‍යෙෂ්ඨ උපසභාපති ධුරයට සරත් ඒකනායක ද පත්කර ඇති බව සඳහන්.
ශ්‍රී ලංකා නිදහස් පක්ෂයේ සියලු ආසන සංවිධායකවරුන් සහ විධායක කමිටු සාමාජිකයින් අද (30) දින පක්ෂ මූලස්ථානය වෙත කැඳවා තිබුණා.
