මිනුවන්ගොඩ ප්‍රදේශයේ බන්ධනාගාර නියාමකවරයෙකුගේ නිවසට ඇතුලු වී නිවැසියන්ට පහරදීම සහ තවත් අපරාධ සම්බන්ධයෙන් සැකකරුවන් දෙදෙනෙකු පොලිස් අත්අඩංගුවට ගෙන තිබෙනවා.
පසුගිය මැයි මස 12 වනදායි සැකකරුවන් බන්ධනාගාර නියාමකවරයාගේ නිවසට ඇතුලු වී නිවැසියන් බිය ගන්වා ගිනි අවියකින් සහ අතින් පයින් පහරදී තර්ජනය කර පළාගොස් තිබුණේ.
මෙම සිද්ධිය සම්බන්ධයෙන් මනුෂ්‍ය ඝාතන හා සංවිධානාත්මක අපරාධ විමර්ශන කොට්ඨාසය වෙත ලැබුණු පැමිණිල්ලක් මත විමර්ශන කටයුතු ආරම්භ කරනු ලැබුවා.
ඒ අනුව පෙරේදා (28) නුවරඑළිය ග්‍රෙගරි වැව ආසන්නයේ ලැගුම්හලක සිටියදී මෙම සිද්ධියට සම්බන්ධ දෙදෙනෙකු අංකය මකා දමන ලද T56 ගිනි අවියක්, එම පතොරම් 30ක් සහිත මැගසිනයක්, අවියට යොදන තවත් පතොරම් 108ක්, පිස්තෝල අවි දෙකක්, එහි මැගසින් 3ක් සහ එම අවියට යොදන පතොරම් 296ක් සමග අත්අඩංගුවට ගනු ලැබුවා.
එම සැකකරුවන් දෙදෙනා බියගම සහ අතුරුගිරිය ප්‍රදේශවල පදිංචි අවුරුදු 36 සහ 39 වයස්වල පසුවන දෙදෙනෙක්.
අතුරුගිරිය ප්‍රදේශයේ පදිංචිව සිටින ප්‍රධාන සැකකරුට නීති විරෝධීව ගිනි අවි සන්තකයේ තබා ගැනීම, මනුෂ්‍ය ඝාතන සඳහා ආධාර අනුබල දීම, නිවසකට අයුතු ලෙසට ඇතුළු වී ගිනි අවි පෙන්වා මරණ තර්ජනය කිරීම සම්බන්ධයෙන් චෝදනා එල්ලවී තිබෙනවා.
අනෙක් සැකකරු රත්නපුර ප්‍රදේශයේ යුද හමුදා කඳවුරක දැනට සේවයේ යෙදී සිටින බියගම ප්‍රදේශයේ පදිංචි යුද හමුදා කපිතාන්වරයෙකු වන අතර ඔහු නීති විරෝධී ගිනි අවි සහ පතොරම් සන්තකයේ තබා ගැනීමට ආධාර අනුබල දීම සම්බන්ධයෙනුයි අත්අඩංගුවට ගෙන ඇත්තේ.
අත්අඩංගුවට ගෙන ඇති T56 ගිනි අවිය ඩුබායි රාජ්‍යයේ සිටින සංවිධානාත්මක අපරාධකරුවෙකුගේ මෙහෙයවීම මත පසුගිය 20 වනදා හෝමාගම නියඳගල ප්‍රදේශයේදී පුද්ගලයෙකුට වෙඩි තබා ඝාතනය කිරීමට යොදාගත් ගිනි අවිය බවට ද සිදු කරන ලද විමර්ශනවලදී හෙළිවී තිබෙනවා.
මනුෂ්‍ය ඝාතන හා සංවිධානාත්මක අපරාධ විමර්ශන කොට්ඨාසය මගින් සැකකරුවන් දෙදෙනා රැඳවුම් නියෝග මත තබාගෙන වැඩිදුර විමර්ශන සිදු කරන බවයි පොලිසිය කියාසිටියේ.
