අපරාධවලට සම්බන්ධ පුද්ගලයන් 42,248කගේ ලැයිස්තුවක් මහජන ආරක්ෂක අමාත්යංශය විසින් දිවයින පුරා පිහිටි සියලු පොලිස් ස්ථානවල අපරාධ අංශ ස්ථානාධිපතිවරුන් වෙත ලබාදී තිබෙනවා.
යුක්තිය මෙහෙයුම සිදු කෙරෙන අතරවාරයේදී ඔවුන් අත්අඩංගුවට ගන්නා ලෙසට එමගින් දැනුම්දී ඇති බවයි වාර්තා වන්නේ.
විවෘත වරෙන්තු සහිත පුද්ගලයන් 35,505ක්, ඇඟිලි සලකුණු මගින් හඳුනාගත් අවශ්ය සැකකරුවන් 4,258ක් සහ පසුගිය වසර දෙක තුළ රට තුළ සිදු වූ අපරාධ සම්බන්ධයෙන් අවශ්යව සිටි පුද්ගලයන් 2,485ක් මෙම ලැයිස්තුවට ඇතුළත් බව සඳහන්.
හෙට (14) සිට ක්රියාත්මක ‘යුක්තිය’ මෙහෙයුමට සක්රීයව සහභාගී වන ලෙසටයි සියලුම පොලිස් ස්ථානවල කොට්ඨාස භාර නිලධාරීන්, දිස්ත්රික් භාර නිලධාරීන්, මූලස්ථාන පරීක්ෂකවරුන් (HQIs) සහ අපරාධ ස්ථානාධිපතිවරුන්ට වැඩ බලන පොලිස්පතිවරයා උපදෙස් දී ඇත්තේ.
ඊට අමතරව අවශ්ය සැකකරුවන් ඉදිරි මාසය තුළ අත්අඩංගුවට ගැනීමේ අරමුණින් පැය 24 පුරාම පොලිස් නිලධාරීන් යොදවන ලෙස පොලිස්පතිවරයා විසින් සියලුම අපරාධ ස්ථානාධිපතිවරුන්ට නියෝග නිකුත් කර තිබෙනවා.
මත්ද්රව්ය සහ පාතාලයට සම්බන්ධ පුද්ගලයින් ඉලක්ක කර ගනිමින් ක්රියාත්මක ‘යුක්තිය’ මෙහෙයුමට අමතරව දිවයින පුරා අපරාධ ක්රියාකාරකම් අවම කිරීම සඳහා දැඩි ප්රයත්නයක් යොදන බවයි මහජන ආරක්ෂක අමාත්යාංශය කියාසිටියේ.
