අනුරාධපුර පූජා නගරයේ ඔරලෝසුකණු වටරවුම අසල අද (15) උදෑසන සිදුවූ දරුණු රිය අනතුරකින් පුද්ගලයින් දෙදෙනෙක් ජීවිතක්ෂයට පත්ව තිබෙනවා.
අනතුරකින් තුවාල ලැබූ ගැබිණි කාන්තාවක් ද බරපතළ තුවාල ලබා අනුරාධපුර ශික්ෂණ රෝහලේ දැඩි සත්කාර ඒකකයේ ප්රතිකාර ලබමින් සිටිනවා.
පාසල් සිසුන් ප්රවාහනය කරමින් ගමන් කළ “සිසු සැරිය” බස් රථයක යතුරුපැදියක් ගැටීමෙන් මෙම අනතුර සිදුව ඇති බව පොලිසිය පවසනවා.
අනතුරට ලක් වූ යතුරුපැදියේ පිරිමි පුද්ගලයින් දෙදෙනෙක් සහ කාන්තාවක් ගමන් කර ඇති අතර, එහිදී පිරිමි පුද්ගලයින් දෙදෙනාම එම ස්ථානයේදීම ජීවිතක්ෂයට පත්ව තිබෙනවා.
මූලික විමර්ශනවලට අනුව, ජීවිතක්ෂයට පත් එක් පුද්ගලයෙක් සහ තුවාල ලැබූ ගැබිණි කාන්තාව පොළොන්නරුව ප්රදේශයේ සිට යහළුවෙකුගේ නිවසට පැමිණ ඇති අතර, අනතුර සිදුවන අවස්ථාවේ තවත් යහළුවෙක් සමඟ යතුරුපැදියේ ගමන් කරමින් සිට ඇති බව අනාවරණය වී තිබෙනවා.
සිද්ධිය සම්බන්ධයෙන් බස් රථයේ රියදුරු සැකපිට අත්අඩංගුවට ගෙන ඇති අතර, අනතුරේ හේතුව සම්බන්ධයෙන් වැඩිදුර විමර්ශන අනුරාධපුර පොලීසිය විසින් විමර්ශන සිදු කරනු ලබනවා
