අද (15) උදෑසන පැවැත්වීමට නියමිතව තිබූ අනුරාධපුර දිස්ත්‍රික්කයේ ශ්‍රී ලංකා නිදහස් පක්ෂ පළාත් පාලන මැතිවරණ අපේක්ෂකයින් සහ එම පක්ෂයේ මහ ලේකම් දයාසිරි ජයසේකර අතර රැස්වීම හදිසියේ වලංගු කළ පුවතක් මීට පෙර අප වාර්තා කළා..
එලෙස පැවැත්වීමට නියමිතව තිබූ එම රැස්වීම දයාසිරි ජයසේකර මහ ලේකම්වරයා විසින් අවලංගු කරන ලෙස හදිසියේම දන්වා ඇති බවයි පක්ෂ අභ්‍යන්තර ආරංචි මාර්ග සඳහන් කළේ.
මේ හේතුවෙන් රැස්වීමට සහභාගී වීම සඳහා පැමිණ සිටි ශ්‍රී ලංකා නිදහස් පක්ෂ පළාත් පාලන මැතිවරණ අපේක්ෂකයින්ට රස්තියාදු වී ආපසු හැරී යෑමටයි අද උදෑසන ඔවුන්ට සිදුවුණේ.
එලෙස අපහසුතාවයට පත් වූ මැතිවරණ අපේක්ෂකයින් දයාසිරි ජයසේකර මහ ලේකම්වරයාට දැඩි විරෝධයක් ද එල්ල කර සිටියා.
කෙසේ වෙතත් මේ සම්බන්ධයෙන් අප ශ්‍රී ලංකා නිදහස් පක්ෂ මහ ලේකම් දයාසිරි ජයසේකරගෙන් විමසීමක් කළා.
එහිදී මහ ලේකම්වරයා සඳහන් කළේ අනුරාධපුර දිස්ත්‍රික් පාර්ලිමේන්තු මන්ත්‍රී දුමින්ද දිසානායක ඇතුළු පිරිසක් මෙම රැස්වීමට කඩාකප්පල් කිරීමට සූදානමින් සිටින බවට සංවිධායකවරුන් කිහිප දෙනෙකුගෙන් තමන් වෙත ඊයේ (14) දිනයේ තොරතුරු ලැබුණු බවයි.
ඒ අනුව අද (15) දිනට පැවැත්වීමට නියමිතව තිබූ මෙම රැස්වීම තාවකාලිකව නැවැත්වීමේ යෝජනාවක් එහිදී එම සංවිධානකවරුන් තමන් වෙත ඉදිරිපත් කළ බව මහ ලේකම්වරයා පවසා සිටියා.
ඔවුන්ගේ එම යෝජනාව සහ ඉල්ලම් සැළකිල්ලට ගෙන එම රැස්වීමට නොපැවැත්වීමට එහිදී තීරණය කළ බවයි නිදහස් පක්ෂ මහලේකම් දයාසිරි ජයසේකර අප සමඟ වැඩිදුරටත් සඳහන් කර සිටියේ.
