කැකිරාව අධ්‍යාපන කලාපයට හා ඉපලෝගම ප්‍රාදේශීය ලේකම් බල ප්‍රදේශයට අයත් අලුත් ගන්තිරියාගම ප්‍රාථමික විද්‍යාලයේ ඉගෙනුම ලබන සිසුන් 100කට අධික පිරිසකගේ හා එම දෙමව්පියන් ඇතුළු ගම්වාසීන්ගේ ජීවිත දැඩි අවදානමකට ලක් කරමින් එල්ල වී තිබෙන අනතුරක් සම්බන්ධයෙන් එම ගම්වැසියන් බලධාරීන්ට පෙන්වාදෙනවා.
අලුත් ගන්තිරියාගම විද්‍යාල භූමියේ ඇති දිරා යමින් පවතින විශාල ප්‍රමාණයේ මාර ගසක් පාසැල් සිසුන් ඇතුළු ගම්වැසියන්ගේ ජීවිත බිලි ගැනීමට මාන බලමින් සිටින බවටයි ඔවුන් චෝදනා කරන්නේ.
කඩා වැටීමේ අවදානමකට ලක් ව ඇති මෙම මාර ගස මේ වනවිට ගම්මානයේ විදුලි පද්ධතියට හේත්තු වී ඇති අයුරු ද දැකිය හැකියි.
මින් පෙර අවස්ථාවක දී ද එම විදුලි පද්ධතිය කඩා වැටුණු බව ද ප්‍රදේශවාසීන් පවසනවා.
මේ හේතුවෙන් වැසි දිනවල දී මාර ගස හරහා විදුලිය ගමන් කිරීම ද සිදුවීමේ දැඩි අවදානමක් මතු ව ඇති අතර එම ගස පිහිටා ඇත්තේ ද පුද්ගලික නිවසක් ආසන්නයේ ම වීම ද අනතුරේ භයානක බව තවත් වැඩිකර තිබෙනවා.
අප ප්‍රාදේශීය වාර්තාකරු පැවසුවේ; එම නිවසේ සිටින දරුවන් නිරන්තරයෙන් මෙම ගස ආසන්නයේ ගැවසෙන බවත් එබැවින් වැසි දිනවල දී එම දරුවන්ගේ මෙන් ම නිවැසියන්ගේ ජීවිත ද බරපතළ අවදානමකට ලක්ව ඇති බවයි.
ඇතැම් අවස්ථාවල දී වැසි දිනවල දී ගසෙහි ගැටී ඇති එම විදුලි වයර් ගිනි ගන්නා බව ද වාර්තා වනවා.
එම ගස ආසන්නයේ අධිබලැති ට්‍රාන්ස්ෆෝමරයක් ඉදිකර ඇති අතර; අනතුරක් වීමට පෙර අදාළ වගකිව යුතු බලධාරීන් මේ පිළිබඳ ව අවධානය යොමු කර දිරාගිය මෙම ගස ඉවත් කිරීමට කටයුතු කර දෙන ලෙසත් ගම්වාසීන් බලධාරීන්ගෙන් ඉල්ලා සිටිනවා.
