පසුගිය පැය 24 තුළ ඇති වූ වර්ෂාපතනය අනුව මාතලේ දිස්ත්‍රික්කයට සහ පොළොන්නරුව දිස්ත්‍රික්කයට වැඩි වර්ෂාපතනයක් පතිත වී ඇති බව ආපදා කළමනාකරණ මධ්‍යස්ථානය පවසනවා.
එම මධ්‍යස්ථානයේ අධ්‍යක්ෂ ජනරාල් සුදන්ත රණසිංහ සඳහන් කළේ බදුල්ල සහ රත්නපුර ප්‍රදේශවලටත් නාය යාම් අවදානම් ඇතිව ඇති බවයි.
උල්හිටිය, නුවර වැව, රාජාංගනය, කලාවැව, වෙහෙරගල, උනච්චයි, මොරගහකන්ද ඇතුළු තවත් වැව් සහ ජලාශ කිහිපයක වාන් දොරටු විවෘත කර ඇති බව ද ඔහු සඳහන් කළා.
මේ හේතුවෙන් ගංවතුර තත්ත්වයන් සම්බන්ධයෙන් අවධානයෙන් සිටින ලෙස ගංඟා ආශ්‍රිතව ජීවත්වන ජනතාවට දැනුම්දීමක් කරනවා.
මීට අමතරව පොළොන්නරුව පරාක්‍රම සමුද්‍රයේ ද වාන් දොරටු ද අද (29) දහවල් වන විට විවෘත කිරීමට සිදුවන බවයි අධ්‍යක්ෂ ජනරාල්වරයා සඳහන් කළේ.
එවැනි තත්ත්වයක් සිදුවුව හොත් ගල්ලෑල්ල ප්‍රදේශය සම්පූර්ණයෙන්ම ජලයෙන් යටවෙන බව සඳහන් කළ ඔහු එම ප්‍රදේශයේ මාර්ග වසා දැමීමට සිදුවන බව ද පැවසුවා.
මේ අතර මහවැලි ගඟ පිටාර ගැලීම සෝමාවතිය ප්‍රදේශය නැවතත් ජලයෙන් යට වී ඇති අතර, සෝමාවතිය පුදබිම වන්දනාමාන කිරීමට පැමිණීමෙන් වළකින ලෙස ද දැනුම් දෙනවා.
අයහපත් කාලගුණය හේතුවෙන් මේ වන විට එම ප්‍රදේශයේ පවුල් පනහක් පමණ සහන මධ්‍යස්ථාන වෙත හෝ වෙනත් ස්ථාන වෙත ඉවත් කිරීමේ කටයුතුවලට යෙදී සිටින බවයි වාර්තා වුණේ.
ඊට අමතරව බදුල්ල සහ රත්නපුර දිස්ත්‍රික්කවල නාය යාමේ අවදානම් මත බදුල දිස්ත්‍රික්කයේ පවුල් එකසිය තිහක්, රත්නපුර දිස්ත්‍රික්කය පවුල් හයක් සහන මධ්‍යස්ථාන වෙත යොමුකර තිබෙනවා.
ඉදිරි පැය 24 තුළ පොළොන්නරුව මාතලේ යන දිස්ත්‍රික්කවල වර්ෂාපතනය තව දුරටත් වැඩිවීමක් අපේක්ෂා කළ හැකියි.
සුළං සහිත වර්ෂාපතනය පවතින විට ගස් කඩාකැවටීමේ අවදානමක් ඇති බවයි ආපදා මධ්‍යස්ථානයේ අධ්‍යක්ෂ ජනරාල්වරයා වැඩිදුරටත් සඳහන් කළේ.
මේ හේතුවෙන් ඒ පිළිබඳ අවධානය යොමු කරන්න ලෙස ද දැනුම් දෙනවා.
