උතුරු ඉන්දියාවේ උත්තර් ප්‍රදේශ් සහ බිහාර් ප්‍රාන්තවල පවතින දැඩි උණුසුම් කාලගුණික තත්වය හමුවේ පසුගිය දින දෙක තුළ පමණක් පුද්ගලයින් 34 දෙනෙකු මිය ගොස් තිබෙනවා.
මෙම ප්‍රාන්තවල දැඩි උණුසුම හේතුවෙන් මේ වන විට පුද්ගලයින් 98 දෙනෙකු මියගොස් ඇති බවයි ඉන්දීය මාධ්‍ය වාර්තා පෙන්වා දෙන්නේ.
පසුගිය දින තුන තුළ උත්තර් ප්‍රදේශ්හි පුද්ගලයින් 54 දෙනෙකු මිය ගිය අතර අසල්වැසි බිහාර් ප්‍රාන්තයේ පුද්ගලයින් 44 දෙනෙකු ජීවිතක්ෂයට පත් වූ බව සඳහන්.
ඉන්දීය සෞඛ්‍ය බලධාරීන් වයස අවුරුදු 60ට වැඩි පුරවැසියන්ට උපදෙස් ලබාදී ඇත්තේ දිවා කාලයේ ගෘහස්ථව රැඳී සිටින ලෙසටයි.
දැඩි උණුසුම හමුවේ මියගිය සියලුදෙනා වයස අවුරුදු 60 ට වැඩි අය වන අතර පෙර පැවති රෝගී තත්වයන් දැඩි උණුසුම හමුවේ උත්සන්න වීම මරණවලට හේතුව ලෙසටයි සැක කෙරෙන්නේ.
පසුගිය බ්‍රහස්පතින්දා පමණක් මරණ 23ක් වාර්තා වූ අතර සිකුරාදා තවත් 11 දෙනෙකු මිය ගිය බව වෛද්‍යවරුන් ප්‍රකාශ කර තිබෙනවා.
මියගිය සියලුම පුද්ගලයින් යම් යම් රෝගාබාධවලින් පෙළෙන අතර අධික උෂ්ණත්වය හේතුවෙන් ඔවුන්ගේ තත්ත්වය නරක අතට හැරී ඇති බවයි ඔවුන් සඳහන් කර ඇත්තේ.
බොහෝ මරණ හෘදයාබාධ, මොළයේ ආඝාත තත්වය සහ පාචනය හේතුවෙන් සිදුව තිබෙනවා.
ඉන්දියානු කාලගුණ විද්‍යා දෙපාර්තමේන්තු දත්ත පෙන්වා දෙන්නේ උත්තර් ප්‍රදේශ් ප්‍රාන්තයේ බැලියා ප්‍රදේශයේ සිකුරාදා දිනයේ උෂ්ණත්වය සෙල්සියස් අංශක 42.2 (ෆැරන්හයිට් අංශක 108) වාර්තා වූ බවයි. එය සාමාන්‍යයට වඩා 4.7C (8F)ක වැඩි වීමක්.
මෙතරම් උෂ්ණත්වයක් පැවතිය ද ප්‍රාන්තය පුරා විදුලිය විසන්ධි වී ඇති අතර, ජලය, විදුලි පංකා හෝ වායුසමීකරණ යන්ත්‍ර නොමැතිව ජනතාව පීඩාවට පත්ව සිටින බව සඳහන්. මෙම තත්වය මත බොහෝ දෙනෙකු උද්ඝෝෂණ ද පවත්වා තිබෙනවා.
භාරතීය ජනතා පක්ෂයේ (BJP) උත්තර් ප්‍රදේශ් ප්‍රධාන අමාත්‍ය යෝගී ආදිත්‍යනාත් මහජනතාවට සහතික වී ඇත්තේ ප්‍රාන්තයේ අඛණ්ඩ විදුලි සැපයුමක් සහතික කිරීම සඳහා රජය අවශ්‍ය සියලු ක්‍රියාමාර්ග ගනිමින් සිටින බවයි. රජය සමඟ සහයෝගයෙන් කටයුතු කරන ලෙසත් විදුලිය අරපිරිමැස්මෙන් භාවිත කරන ලෙසත් ඔහු ජනතාවගෙන් ඉල්ලීමක් කර තිබෙනවා.
ප්‍රධාන ගිම්හාන මාස වන අප්‍රේල්, මැයි සහ ජුනි කාලය තුළ මෝසම් වැසි ඒමට පෙර ඉන්දියාවේ බොහෝ ප්‍රදේශවල සාමාන්‍යයෙන් දැඩි උණුසුමක් පවතිනවා. නමුත් පසුගිය දශකය තුළ එම උෂ්ණත්වය වඩාත් තීව්ර වී ඇති බවයි විදෙස් මාධ්‍ය වාර්තා පෙන්වා දෙන්නේ.
