අධිකරණ හා ජාතික ඒකාබද්ධතා අමාත්ය නීතිඥ හර්ෂණ නානායක්කාර මහතා අද (16) අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කිරීමට පැමිණියා.
පාර්ලිමේන්තු නිල වෙබ් අඩවියට ව්යාජ දත්ත ඇතුළත් කර තිබීම සම්බන්ධයෙන් අමාත්යවරයා මෙම පැමිණිල්ල ඉදිරිපත් කර තිබෙනවා.
මෙහිදී අමාත්යවරයා මාධ්ය වෙත අදහස් දක්වමන් සඳහන් කළේ තමාව අපකීර්තියට පත්කිරීමට හෝ තම දේශපාලනය කෙරෙහි ඇති විශ්වාසය බිඳ දැමීමේ අරමුණින් මෙම ව්යාජ දත්ත ඇතුළත් කිරීම සිදුකර ඇත්දැයි සැකයක් පවතින බවයි.
පාර්ලිමේන්තු නිල වෙබ් අඩවියේ අමාත්යවරයාගේ නම ලෙස ‘ආචාර්ය’ හර්ෂණ නානායක්කාර යනුවෙන් පළ කර තිබී පසුව එය ඉවත් කිරීමට කටයුතු කර තිබීම සම්බන්ධයෙන් සමාජය තුළ දැඩි කතාබහක් මතු වුණා.
කෙසේ වෙතත් පසුව පාර්ලිමේන්තු නිල වෙබ් අඩවියේ අමාත්යවරයාගේ නම ඉදිරියේ යොදා තිබූ ‘ආචාර්ය’ නාමය ඉවත් කිරීමට කටයුතු කර තිබූ අතර, එය වැරදීමක් ලෙස දක්වමින් පාර්ලිමේන්තු මහලේකම් කාර්යාලය ඔහුට ලිපියක් ද යොමුකර තිබුණා.
