අධ්යාපන සභාව පිහිටුවීම පිළිබඳ අනු කාරක සභාව විසින් අනුමත කරන ලද ශ්රී ලංකාවේ අධ්යාපන සභාවක් පිහිටුවීම සඳහා නිර්දේශ ඉදිරිපත් කිරීමට පත් කළ කමිටුවේ අවසන් වාර්තාව අධ්යාපන, උසස් අධ්යාපන සහ වෘත්තීය අධ්යාපනය පිළිබඳ අමාත්යාංශයීය උපදේශක කාරක සභාව විසින් පසුගිය දා පාර්ලිමේන්තුවේදී සාකච්ඡා කර අනුමත කරනු ලැබුවා.
ඒ, ආචාර්ය හරිනි අමරසූරිය අග්රාමාත්යවරියගේ සභාපතිත්වයෙන් පැවති අධ්යාපන, උසස් අධ්යාපන සහ වෘත්තීය අධ්යාපනය පිළිබඳ අමාත්යාංශයීය උපදේශක කාරක සභා රැස්වීමේදීයි.
මෙහිදී අනු කාරක සභාවේ සභාපති, නියෝජ්ය අමාත්ය මහින්ද ජයසිංහ මහතා විසින් උක්ත වාර්තාව කාරක සභාවට ඉදිරිපත් කරන ලදී. ශ්රී ලංකාවේ අධ්යාපන සභාවක් පිහිටුවීම සඳහා නිර්දේශ ඉදිරිපත් කිරීමට අමාත්යාංශය විසින් පත් කළ විද්වත් කමිටුව විසින් සිදු කරන ලද අධ්යයනයකින් පසුව ඉදිරිපත් කරන ලද නිරීක්ෂණ සහ නිර්දේශ ඒකී වාර්තාවට ඇතුළත් වනවා.
ඉන් අනතුරුව වාර්තාවේ අන්තර්ගත කරුණු පිළිබඳව කාරක සභාවේ සාමාජිකයන්ගේ අදහස් හා යෝජනා විමසා බැලූ අතර, සාකච්ඡාවෙන් අනතුරුව එම වාර්තාව සඳහා අමාත්යාංශයීය උපදේශක කාරක සභාවේ අනුමැතිය හිමිවුණා.
මෙම රැස්වීමට අමාත්යවරුන්, නියෝජ්ය අමාත්යවරුන්, පාර්ලිමේන්තු මන්ත්රීවරුන් සහ අධ්යාපන, උසස් අධ්යාපන සහ වෘත්තීය අධ්යාපනය අමාත්යාංශයේ නිලධාරීහු සහභාගි වුණා.
