ගැසට් නිවේදනයක් මඟින් ප්රකාශයට පත්කළ නියමිත බරට පාන් අලෙවි කරන්නේ ද යන්න සොයා බැලීමට අද (05) දිනයේ සිට මෙහෙයුම් ආරම්භ කරන බව පාරිභෝගික කටයුතු පිළිබඳ අධිකාරිය සඳහන් කළා.
පාරිභෝගික කටයුතු පිළිබඳ අධිකාරිය සහ කිරුම් මිනුම් පිළිබඳ දෙපාර්තමේන්තුව විසින් දිවයින පුරා මෙම මෙහෙයුම් ක්රියාත්මක කරනවා.
අදාල රෙගුලාසිවලට අනුව කටයුතු නොකරන වෙළඳසැල්වලට සහ බේකරිවලට එරෙහිව දැඩිව නීතිය ක්රියාත්මක කරන බවයි පාරිභෝගික කටයුතු පිළිබඳ අධිකාරිය පැවසුවේ.
පාන් ගෙඩියක සහ පාන් භාගයට අදාළව නියමිත බර සඳහන් කරමින් රජය විසින් ගැසට් නිවේදනයක් පසුගිය දා නිකුත් කළා.
පාන් ගෙඩියක නියමිත බර ග්රෑම් 450ක් විය යුතු බවටත්, එහි වෙනස් වීම ග්රෑම් 13.5ක් විය යුතු බවටත් අදාළ ගැසට් නිවේදනයේ දැක්වෙනවා.
ඊට අමතරව පාන් භාගයක නියමිත බර ග්රෑම් 225ක් විය යුතු බවත්, බර වෙනස් වීම ග්රෑම් 09ක් ලෙසත් එහි සඳහන්.
එමෙන්ම අලෙවියට තබා ඇති පාන් ගෙඩියක බර ප්රදර්ශනයකර තිබීම ද අදාළ ගැසට් නිවේදනය මඟින් ප්රකාශයට පත්කර තිබෙනවා.
මේ අතර අදාළ ගැසට් නිවේදනයට අනුව පාන් අලෙවිය අපහසු බවයි සමස්ත ලංකා බේකරි හිමියන්ගේ සංගමය සඳහන් කළේ.
