බණ්ඩාරගම, අටළුගම දී ඝාතනයට ලක්ව වූ ෆාතිමා ආයීෂා දැරියගේ අවසන් කටයුතු ඊයේ (30) පස්වරුවේ සිදුකෙරුණා.
ඒ, අටළුගම මහා පල්ලියට අයත් සුසාන භුමියේ දීයි .
මේ අතර දැරියගේ ඝාතනය සම්බන්ධයෙන් සැකපිට අත්අඩංගුවට ගත් සැකකරු ඊයේ (30) අධිකරණයට ඉදිරිපත් කිරීමෙන් පසු දින 03ක් රඳවාගෙන ප්රශ්න කිරීමට පොලිසියට අවසර ලබා දී තිබෙනවා.
කෙසේ වෙතත් සැකකරු පසුගිය 27 වැනි දා දැරිය ඝාතනය කළ බවට පොලීසිය හමුවේ පාපොච්චාරණයක් ද කළ බවයි මීට පෙර වාර්තා වූණේ.
අපරාධය සම්බන්ධයෙන් අත්අඩංගුවට ගැනුණු 29 හැවිරිදි සැකකරු අවුරුදු 03,05 සහ 08 යන වයස්වල පසුවන දැරියන් තුන්දෙනෙකුගේ පියෙක්.
එසේම ඔහුගේ බිරිඳ තවත් දරුවෙකු ප්රසූත කිරීමට සූදානමින් පසුවන්නියක් බවයි වාර්තා වන්නේ.
සැකකරු අයිස් මත්ද්රව්ය භාවිතයට ඇබ්බැහිවූවෙකු බවටයි හඳුනාගෙන ඇත්තේ.
ෆාතිමා අයීෂා නම් දැරිය අතුරුදන්ව තිබුණේ පසුගිය 27 වැනිදා නිවස ආසන්නයේ වෙළදසැලකට කුකුළු මස් මිල දී ගැනීම සඳහා ගොස් ආපසු පැමිණෙමින් සිටින අතරතුරයි.
දැරියගේ අතුරුදන් වීමෙන් පසුව ප්රදේශවාසීන් සහ පොලිසිය එක්ව දරුවා සෙවීමට කටයුතු කළ අතර පසුගිය 28 වැනිදා ඇගේ සිරුර, නිවසට යාබද වගුරු බිමක තිබී සොයා ගැනුණා.
දැරිය සිවීමේ මෙහයුම් සඳහා ඝාතනය සිදුකළ සැකකරුද එක්ව සිටි බවටයි කරුණු අනාවරණය වී ඇත්තේ.
