මීට වසර දෙකහමාරකට පෙර නව හැවිරිදි දැරියක් පානදුර අටළුගම ප්‍රදේශයේ දී කුඹුරුයායක මඩේ ගිල්වා මරා දැමීමේ චෝදනාව ඇතුළු චෝදනාවලට වරද පිළිගත් විත්තිකරුවෙකුට පානදුර මහාධිකරණ විනිසුරු සමන් කුමාර මහතා අද (13) දින බරපතල වැඩසහිත වසර 27ක සිර දඩුවමක් නියම කළා.
සාවද්‍ය නොවන මනුෂ්‍ය ඝාතන චෝදනාවට හා එම දැරියව ඇගේ මවගෙන් පැහැරගෙන ගොස් අපහරණය කිරීමේ චෝදනාවට එකී සිරදඩුවම් නියම කළ විනිසුරුවරයා මියගිය දැරියගේ මවට රුපියල් ලක්ෂ 30ක වන්දියක් ගෙවන ලෙසට ද ෆාරුක් මොහොමඩ් ගනේසනාදන් හෙවත් පල්ලිකුට්ටි නැමති විත්තිකරුට නියෝග කර සිටියා.
එකී වන්දිය නොගෙවන්නේනම් වසර හය හමාරක ලිහිල් සිර දඩුවම් ලබා දීමට ද විනිසුරුවරයා නියෝග කළා.
එම දැරියව 2022 මැයි මස 27 වනදා ඇගේ නිවස ආසන්නයේ කඩමණ්ඩියේ පිහිටි කඩයකට ගෙන ගොස් එන අතරතුර දුෂණය කිරීමේ අරමුණින් ඇයව රවටා අවට පිහිටි ලදු කැලෑවකට ගෙන ගොස් දුෂණය කිරීමට උත්සාහ කර ඇතත් ඇයගේ කැගැසීම නිසා බියට පත් විත්තිකරු මඩ වගුරුවක ඔබා ඝාතනය කර ඇති බවත් ඇය දුෂණයට ලක් වී නොමැති බවත් විමර්ශනවලදී අනාවරණ වී තිබුණා.
බණ්ඩාරවෙල පොලිසිය හා පානදුර කොට්ඨාස දුෂණ විමර්ශන අංශය සිදුකළ විමර්ශන අනුව නීතිපතිවරයා විසින් මාස 06ක් වැනි කෙටි කාලයක් තුළ එම විත්තිකරුට එරෙහිව පානදුර මහාධිකරණය හමුවේ නඩු පැවරීමට පියවර ගෙන තිබුණා.
එම විත්තිකරු එම දැරියගේ පියාගේ මිතුරෙකු බවත් එම නිවසට නිතර යන එන අයෙකු වන බැවින් එම දැරිය කිසිදු චකිතයකින් තොරව ඔහු සමඟ ගොස් ඇති බවත් විමර්ශනවල දී අනාවරණ වී තිබෙනවා.
