මහින්ද රාජපක්ෂ නැවත අගමැති ධුරයට පත් කළ ද රටේ පවතින ගැටලුවලට විසඳුමක් නොලැබෙන බව සමගි ජන බලවේගයේ පාර්ලිමේන්තු මන්ත්‍රී තිස්ස අත්තනායක පවසනවා.
ආර්ථික අර්බුදයට විසඳුම් සෙවිය යුත්තේ රට ඉක්මනින් යථා තත්ත්වයට පත් කළ හැකි කාර්යක්ෂම වැඩපිළිවෙලකින් බවයි ඔහු පෙන්වා දෙන්නේ.
එමෙන්ම මහින්ද රාජපක්ෂ මහතා නැවත අගමැති ධුරයට පත් කරන්නේ නම් එය එම පක්ෂයේ සහ රජයේ කටයුත්තක් බව ද ඔහු කියාසිටියා.
සමගි ජන බලවේගය හෝ වෙනත් කිසිදු පක්ෂයක් මැතිවරණය ප්‍රතික්ෂේප නොකරන බව ද මන්ත්‍රී තිස්ස අත්තනායක ප්‍රකාශ කළා.
අද මීරිගම ප්‍රදේශයේදී මාධ්‍ය වෙත අදහස් දක්වමින් ඔහු කියාසිටියේ විපක්ෂය මැතිවරණයක් නොපවත්වන ලෙසට ඉල්ලා සිටි බවට ප්‍රකාශ කිරීම ජනාධිපතිවරයා කියන විශාලතම බොරුව බවයි.
එලෙස මැතිවරණය කල් දමන ලෙසට ප්‍රකාශ කළ මන්ත්‍රීවරුන් හෙළි කරන ලෙසට ජනාධිපතිවරයාගෙන් ඉල්ලා සිටින බව ද තිස්ස අත්තනායක ප්‍රකාශ කළා.
මැතිවරණ සිතියම හකුළා දැමීමට ජනාධිපති රනිල් වික්‍රමසිංහ දක්ෂ ලෙස කටයුතු කර ඇති අතර එය කල් දැමීමට විපක්ෂය භාවිත නොකර ජනතාව ඉල්ලා සිටින මැතිවරණය ලබාදෙන ලෙසටයි ඔහු කියාසිටියේ.
මාධ්‍යවේදීන් මෙහිදී බදු සංශෝධන සහ විදුලි බිල සම්බන්ධයෙන් ද ප්‍රශ්න කළා.
මන්ත්‍රීවරයා ඊට පිළිතුරු දෙමින් කියාසිටියේ බදු වැඩි කිරීමට සහ විදුලි බිල වැඩි කිරීමට ජාත්‍යන්තර මූල්‍ය අරමුදල ප්‍රකාශ නොකරන බවයි.
මූල්‍ය අරමුදල ප්‍රකාශ කරන්නේ රටේ ආදායම වැඩි කර ගැනීම සම්බන්ධයෙන් වන අතර ඒ වෙනුවෙන් වියදම් සහ නාස්තිය ද අවම කර ගත යුතු බවයි ඔහු පෙන්වා දෙන්නේ.
නාස්තිය සහ වියදම අවම කර ගැනීමකින් තොරව ආදායම වෙනුවෙන් බදු ඉහළ දැමීම පිළිගත නොහැකි බව තිස්ස අත්තනායක සඳහන් කළා.
විදුලිබල මණ්ඩලය තුල ඇති දූෂණය අවම කර රජයේ වෙනත් නාස්තිකාර වියදම් ද අවම කරන්නේ නම් ජනතාවට සහන ලබාදිය හැකි බවයි ඔහු කියාසිටියේ.
