ගෝලීය වශයෙන් සිදුවූ ආර්ථික පසුබෑම් සහ දේශීය මූල්ය කළමනාකරණයේ දුර්වලතා හමුවේ, යුද පීඩිත යුක්රේනයට පමණක් දෙවැනි වෙමින් ලොව දෙවැනියට ඉහළම අකර්මණ්ය ණය හෙවත් අයකකරගත නොහැකි වූ පැහැර හරින ලද ණය (Non-Performing Loan – NPL) අනුපාතය සහිත රට බවට බංග්ලාදේශය පත්ව ඇති බව ‘ද බිස්නස් ස්ටෑන්ඩර්ඩ්’ පුවත්පත වාර්තා කරයි. බංග්ලාදේශයේ සමස්ත බැංකු ණයවලින් තුනෙන් එකකට ආසන්න ප්රමාණයක් මේ වන විට පැහැර හරින ලද ණය ගණයට වැටී තිබෙනවා.
නවතම බැංකු දත්තවලට අනුව, වත්මන් යුදමය තත්ත්වය හේතුවෙන් ආර්ථිකය බිඳවැටී ඇති යුක්රේනය 37.35%ක NPL අනුපාතයක් සමඟ ලෝක ලැයිස්තුවේ පෙරමුණේ පසුවන අතර, බංග්ලාදේශය 32.26%ක NPL අනුපාතයක් ලබාගනිමින් දෙවැනි ස්ථානයේ පසුවනවා.
චැඩ් රාජ්යය (31.51%) සහ ගිනියාව (31.15%) පිළිවෙළින් ඊළඟ ස්ථානවල පසුවනවා.
දකුණු ආසියානු කලාපීය සහයෝගිතා සංවිධානයේ (SAARC) රටවල් අතරින් ද බංග්ලාදේශය ඉහළම NPL අනුපාතය වාර්තා කර ඇති අතර, එය අසල්වැසි රටවලට වඩා 6 සිට 15 ගුණයක් දක්වා ඉහළ අගයක්.
කලාපයේ අනෙකුත් රටවල අකර්මණ්ය ණය අනුපාතයන් පහත පරිදි වනවා:
- ඉන්දියාව: 2.2%
- භූතානය: 4.5%
- මාලදිවයින: 5.5%
- නේපාලය: 5.6%
- පාකිස්ථානය: 5.8%
- ශ්රී ලංකාව: 6.5%
බංග්ලාදේශ බැංකු දත්තවලට අනුව, වසරේ මුල් මාස තුන තුළ පමණක් අකර්මණ්ය ණය ප්රමාණය ටකා බිලියන 310කින් ඉහළ ගොස් ඇති අතර, සමස්ත පැහැර හරින ලද ණය ප්රමාණය ටකා ට්රිලියන 5.89ක් දක්වා වර්ධනය වී තිබෙනවා.
ප්රතිව්යුහගත කරන ලද ණය සහ විශේෂිත ගිණුම් ද ඇතුළත් කළ විට, සමස්ත පීඩනයට ලක්වූ වත්කම් ප්රමාණය ටකා ට්රිලියන 11.2ක් දක්වා ඉහළ යන අතර, එය සමස්ත බැංකු ණය පද්ධතියෙන් 61%ක් තරම් අතිදැවැන්ත ප්රමාණයක්.
මෙම අර්බුදයෙන් ගොඩ ඒම සඳහා බංග්ලාදේශ මහ බැංකු අධිපති මොහොමඩ් මුස්තාකුර් රහ්මාන් විසින් මාස 18ක විශේෂ ක්රියාකාරී සැලැස්මක් ප්රකාශයට පත් කර තිබෙනවා.
ඒ යටතේ 2027 වන විට ජාත්යන්තර මූල්ය වාර්තාකරණ ප්රමිතිවලට අනුව ‘අපේක්ෂිත ණය අලාභ’ ක්රමවේදය හඳුන්වා දීමටත්, මාස 6ක් ඇතුළත නඩු විසඳිය හැකි නව ණය අධිකරණ පනතක් සහ අවදානමක් සහිත වත්කම් කළමනාකරණය සඳහා වෙනම සමාගම් පිහිටුවීමට අදාළ පනතක් කඩිනමින් සම්මත කිරීමටත් රජය සැලසුම් කරමින් සිටිනවා.
