හිටපු මන්ත්‍රී ප්‍රේමලාල් ජයසේකරට දැඩි කොන්දේසි මත ඇප

නුවරඑළිය ප්‍රදේශයේ දී පුද්ගලයෙකුට ගිනි අවියක් පෙන්වා තර්ජනය කළේ යැයි කියන සිද්ධියක් සම්බන්ධයෙන් පොලිසිය විසින් අත්අඩංගුවට ගෙන අද (22) දිනයේ අධිකරණය වෙත ඉදිරිපත් කළ රත්නපුර දිස්ත්‍රික් හිටපු පාර්ලිමෙන්තු මන්ත්‍රී ප්‍රේමලාල් ජයසේකර ඇප මත මුදාහැර  තිබෙනවා.

මෙහිදී රුපියල් ලක්ෂ 10ක ශරීර ඇපයක් සහ රුපියල් 25,000ක මුදල් ඇපයක් ඔහුට නියම කෙරුණා.

ඊට අමතරව ඔහුට විදෙස් ගමන් තහනමක් ද නුවරඑළිය මහේස්ත්‍රාත් අධිකරණ විසින් පනවනු ලැබුවා.

ඇප නියමකරමින් මහේස්ත්‍රාත්වරයා සඳහන් කළේ, පැමිණිලිකරුවන්ට බලපෑම් කිරීමෙන් වැළකී සිටිය යුතු බවත් එසේ නොවුන හොත් රක්ෂිත බන්ධනාගාර ගත කිරීමට සිදුවන බවයි.

ප්‍රේමලාල් ජයසේකර හිටපු මන්ත්‍රීවරයා සිය පවුලේ සාමාජිකයන් සමඟ ඊයේ (21) දිනයේ නුවරඑළිය ප්‍රදේශයේ සංචාරයක් සදහා පැමිණි අවස්ථාවේ, තවත් පිරිසක් සමඟ ඇති වූ ආරවුලක දී සිය ගිනිඅවිය පෙන්වා පුද්ගලයෙකුට තර්ජනය කළේ යැයි කියන සිද්ධියක් සම්බන්ධයෙන් නුවරඑළිය පොලිසිය වෙත පැමිණිල්ලක් ලැබී තිබුණා.

ඒ, අනුව අදාළ පැමිණිල්ල සම්බන්ධයෙන් හිටපු මන්ත්‍රීවරයා අත්අඩංගුවට ගැනීමට පොලිසිය කටයුතු කළ අතර, සතුව තිබූ ගිනි අවියට ආරක්ෂක අමාත්‍යාංශය විසින් නිකුත් කර තබූ බලපත්‍රය කල් ඉකුත් වී තිබූ බවට අනාවරණය වී තිබෙනවා.