බන්ධනාගාරවල පවතින තදබදය අවම කිරීම සඳහා ගත හැකි ක්රියාමාර්ග පිළිබඳව පොලිස් දෙපාර්තමේන්තුවේ අදහස් හා යෝජනා ලබා ගැනීම කෙරෙහි රාජ්ය පාලනය, යුක්තිය සහ සිවිල් ආරක්ෂණය පිළිබඳ ආංශික අධීක්ෂණ කාරක සභාවේ අවධානය යොමුව තිබෙනවා.
එම කාරක සභා සභාපති පාර්ලිමේන්තු මන්ත්රී වෛද්ය නජිත් ඉන්දිකගේ ප්රධානත්වයෙන් පාර්ලිමේන්තුවේ දී පසුගිය දා පැවති මෙම රැස්වීමේදී, විශේෂයෙන් මත්ද්රව්ය සම්බන්ධයෙන් අත්අඩංගුවට ගැනීමේ සිට නඩු පැවරීම දක්වා පොලිස් දෙපාර්තමේන්තුවේ ක්රියාවලිය මෙන්ම, ඒ සඳහා පවතින නෛතික බාධා ඉවත් කිරීම සම්බන්ධයෙන් ද සාකච්ඡා කෙරුණා.
එහිදී මත්ද්රව්ය සම්බන්ධ නඩු කටයුතු ප්රමාදවීම, රජයේ රස පරීක්ෂක වාර්තා ලබාගැනීමේ ප්රමාදයන් සහ එමගින් රක්ෂිත බන්ධනාගාරගතව සිටින සැකකරුවන්ගේ සංඛ්යාව ඉහළ යාම පිළිබඳව ද අවධානය යොමු වුණා.
මත්ද්රව්ය මර්දනයේ දී පුද්ගලයන් අත්අඩංගුවට ගැනීම පමණක් නොව, මත්ද්රව්ය ජාවාරම් ජාල සහ ඒවාට සම්බන්ධ නීති විරෝධී මූල්ය ගනුදෙනු හඳුනාගෙන පාලනය කිරීම සඳහා නවීන තාක්ෂණය භාවිත කිරීමේ අවශ්යතාව ද මෙහිදී අවධාරණය කෙරුණා.
එමෙන්ම දුරකථන සමාගම් මගින් ක්රියාත්මක කරනු ලබන ඩිජිටල් මුදල් හුවමාරු ක්රම මත්ද්රව්ය ජාවාරම්කරුවන් විසින් නීති විරෝධී මූල්ය ගනුදෙනු සඳහා අවභාවිත කිරීම වැළැක්වීම සඳහා සුදුසු නියාමන ක්රමවේද හඳුන්වා දීමේ අවශ්යතාව ද මෙහිදී පෙන්වා දුන්නා.
තවද, මත්ද්රව්යවලට ඇබ්බැහි වූ පුද්ගලයන් සම්බන්ධයෙන් බන්ධනාගාරගත කිරීම වෙනුවට ප්රජාමූලික පුනරුත්ථාපන වැඩපිළිවෙළක් ශක්තිමත් කිරීම, අපරාධ වැළැක්වීම සඳහා මහජන සහභාගිත්වය වැඩිදියුණු කිරීම සහ පවතින නීති කාලීන අවශ්යතාවන්ට ගැළපෙන පරිදි සංශෝධනය කිරීමේ අවශ්යතාව ද සාකච්ඡාවට ලක් වුණා.
එමෙන්ම, අපරාධ විමර්ශන කටයුතු කඩිනම් කිරීම සඳහා පොලිස් දෙපාර්තමේන්තුව තුළ නවීන අධිකරණ වෛද්ය විද්යාගාරයක් (Forensic Laboratory) ස්ථාපිත කිරීමේ අවශ්යතාව පිළිබඳව ද අදහස් ඉදිරිපත් වුණා.
විද්යාත්මක සාක්ෂි විශ්ලේෂණය කඩිනම් කිරීම මඟින් නඩු කටයුතු වේගවත් කර බන්ධනාගාර තදබදය අවම කිරීමට හැකි වනු ඇති බව ද මෙහිදී පෙන්වා දෙනු ලැබුවා.
මීට අමතරව, පොලිස් නිලධාරීන්ගේ සුබසාධනය, වෘත්තීය පුහුණුව සහ විමර්ශන කුසලතා ඉහළ නැංවීම මෙන්ම පොලිස් කාර්ය සාධනය ඇගයීමේ ක්රමවේද වැඩිදියුණු කිරීම පිළිබඳව ද අවධානය යොමු වුණා.
