කොන්ඩම් අවසන් වී ශීත ඍතු ඔලිම්පික් උළෙලේ අනපේක්ෂිත අර්බුදයක්

2026 ශීත ඍතු ඔලිම්පික් උළෙලේ සංවිධායකින් තරමක් අනපේක්ෂිත අර්බුදයකට මුහුණ පා සිටිනවා.

ක්‍රීඩක ක්‍රීඩිකාවන්ගේ ගම්මානයේ නොමිලේ ලබාදුන් උපත් පාලන කොපු (කොන්ඩම්) ඔලිම්පික් උළෙල ආරම්භ වී දින කිහිපයක පසු අවසන්වීම මීට හේතු වී තිබෙනවා.

මූලික සැපයුම යටතේ ඔලිම්පික් ගම්මානයට උපත් පාලන කොපු 10,000ක් නොමිලේ ලබා දී තිබූ බවයි වාර්තා වන්නේ.

කෙසේ වෙතත් එම තොගය අවසන් වීමෙන් පසු උපත් පාලන කොපු සඳහා දැඩි අවශ්‍යතාවයක් මතුව ඇති අතර, ඒවා සපයන බවට සංවිධායකයින් විසින් පොරොන්දු ලබා දී ඇතත්, නිශ්චිත කාලරාමුවක් තවමත් ප්‍රකාශ කර නැහැ.

ලිංගිකව සම්ප්‍රේෂණය වන රෝග වැළැක්වීම පිළිබඳව ක්‍රීඩක ක්‍රීඩිකාවන් සහ තරුණයින් දැනුවත් කිරීම සඳහා 1988 සෝල් ඔලිම්පික් උළෙලේ සිට ඔලිම්පික් ගම්මානයට උපත් පාලන කොපු බෙදාදීම සිදු කෙරෙනවා.

2026 මිලාන්-කෝර්ටිනා ශීත ඍතු ඔලිම්පික් උළෙල පසුගිය 06 වනදා ආරම්භ වූ අතර, එය ලබන 22 වනදා දක්වා පැවැත්වෙනවා.

මේ සඳහා ක්‍රීඩක ක්‍රීඩිකාවන් 2,800 කට වැඩි පිරිසක් සහභාගීව සිටිනවා.