ඉරාන නාවික හමුදාවට අයත් IRINS ‘Bushehr’ සහ ‘Tonb’ නෞකාවන් නිල සංචාරයක් සඳහා අද (16) කොළඹ වරායට සේන්දු වුණා.
මෙහිදී ශ්රී ලංකා නාවික හමුදාව විසින් එම නෞකාවන් නාවික හමුදා සම්ප්රදායානුකුලව පිළිගැනීමට කටයුතු කළා.
මෙලෙස කොළඹ වරායට සේන්දු වූ IRINS ‘Bushehr’ නෞකාව, දිගින් මීටර් 107 හා නැව් මුළුව 270 දෙනෙකුගෙන් සමන්විතයි.
එම නෞකාවේ අණදෙන නිලධාරී ලෙස, කොමාණ්ඩර් MAHDI BALVARDI කටයුතු කරනු ලබනවා.
එමෙන්ම, ‘Tonb’ නෞකාව, දිගින් මීටර් 94.94 හා නැව් මුළුව 250 දෙනෙකුගෙන් සමන්විත අතර, නෞකාවේ අණදෙන නිලධාරී ලෙස කොමාණ්ඩර් MOHAMMAD HAJI ZADEH කටයුතු කරනවා.
මෙම නෞකාවන් මෙරට රැඳී සිටින කාලසීමාව තුළ නෞකාවන්ගේ අණදෙන නිලධාරීන් විසින් බටහිර නාවික විධානයේ ආඥාපති සහ නාවික හමුදා අධ්යක්ෂ ජෙනරාල් මෙහෙයුම් සමඟ නිල හමුවන් පැවැත්වීමට නියමිතව තිබෙනවා.
ඊට අමතරව එම නැව් මුළුවන්, ශ්රී ලංකා නාවික හමුදාව විසින් දෙරටේ නාවික හමුදාවන් අතර සුහදත්වය වැඩිදියුණු කිරීම වෙනුවෙන් සංවිධානය කරනු ලබන වැඩසටහන් සඳහා සහභාගීවීමට නියමිතයි.
එමෙන්ම දිවයිනේ වැදගත් ස්ථාන නැරඹීම සඳහා ප්රදේශ කිහිපයක සංචාරය කිරීමටද නියමිතව ඇති බව සඳහන්.
තවද, මෙම නෞකාවන් නැරඹීම සඳහා නාවික හමුදා ශිෂ්ය භට නිලධාරීන්ට සහ නාවික හමුදා සාමාජිකයන් හට අවස්ථාව ලබාදීම මෙන්ම ශ්රී ලංකා නාවික හමුදා නෞකාවන් නැරඹීම සඳහා ඉරාන ශිෂ්ය භට නිලධාරීන් හා එරට නාවිකයන් හට අවස්ථාව ලබාදීම ඇතුළු පුහුණු හුවමාරු වැඩසටහනක් පැවැත්වීමටද කටයුතු සූදානම් කර තිබෙනවා.
IRINS ‘Bushehr’ සහ ‘Tonb’ නෞකාවන් නිල සංචාරය නිමා කරමින් ලබන 19 වන දින දිවයිනෙන් පිටත්ව යාමට නියමිතයි.
