ඔස්ට්‍රේලියානු රජය ඉන්ධන බදු ඉවත් කරයි.

ඉහළ යන ජීවන වියදම හමුවේ ඉන්ධන බදු කපා හැර සාමාන්‍ය ජනතාවට සහන සැළසීමට ඔස්ට්‍රේලියානු ෆෙඩරල් රජය තීරණය කර තිබෙනවා.

එරට පාර්ලිමේන්තුවට ඊයේ ඉදිරිපත් කල 2022-23 වසර සඳහා වන අයවැය ලේඛනයට අනුව මෙතෙක් ඉන්ධන ලීටරයක් මත පණවා තිබූ සත 44 ක බද්ද සත 22 කින් එනම් ශ්‍රී ලංකා මුදලින් ලීටරයකට රුපියල් 48 කින් පමණ අඩු කිරීමටයි පියවර ගෙන ඇත්තේ.

මෙලෙස ගත් විට වාහන 02 ක් සහිත පවුලකට මාස 06 ක කාලයක් සඳහා ඩොලර් 700 ක් හෙවත් ශ්‍රී ලංකා මුදලින් රුපියල් 154,000 ක පමණ සහනයක් හිමිවනු ඇති බවටයි තක්සේරු කර ඇත්තේ.

ගෝලීය ඉන්ධන අර්බුදයක් පැවතියද මහජනතාවට සහන සැළසිය යුතු බවට වන ස්ථාවරයේ හිදිමින් රජයේ ආදායම අහිමි කරගනිමින් වුවද මෙම තීරණය ගත් බව ඔස්ට්‍රේලියානු ෆෙඩරල් රජය නිවේදනය කරනවා.

ඉන්ධන මත පණවා ඇති බද්දෙන් ලැබෙන ආදායමෙනුයි එරට රජය මාර්ග සංවර්ධන කටයුතු සිදුකරනු ලැබුවා.කෙසේවෙතත් පවතින තත්වය හමුවේ මාර්ග සංවර්ධනයට වඩා ජනතාවට ඉන්ධන සහනයක් ලබාදීම අත්‍යවශ්‍ය බව තීරණය කර ඔස්ට්‍රේලියානු ෆෙඩරල් රජය මෙම තීරණය ගෙන තිබෙනවා.