ශ්‍රී ලංකාවේ ආර්ථිකය තවදුරටත් කඩාවැටීමට පෙර මෙරට මුහුණපා ඇති විදෙස් විනිමය ගැටලුව හැකි ඉක්මනින් විසඳීමට පියවර ගන්නා ලෙස වාණිජ මණ්ඩල එකමුතුව රජයෙන් ඉල්ලා සිටී.
ශ්‍රී ලංකාව මුහුණපා ඇති විදෙස් විනිමය ගැටලුව හේතුවෙන් දෛනික ඉන්ධන සහ විදුලිබල සැපයුමට බාධා එල්ලවී ඇති බව පෙන්වා දෙන ඔවුන් පවසන්නේ ඉන්ධන සහ විදුලිය ආර්ථිකයේ සියලුම ක්ෂේත්‍රයන් නිසි පරිදි ක්‍රියාත්මකවීම සඳහා අත්‍යවශ්‍ය බවය.
එසේම මේ වනවිට බොහෝ කර්මාන්තකරුවන් සිය අමුද්‍රව්‍ය සඳහා ගෙවීම් කරගැනීමට නොහැකිව අපහසුතාවයට පත්ව ඇති බවද වාණිජ මණ්ඩල පෙන්වාදෙයි.
එමගින් දේශීය සහ විදේශීය වෙළෙඳපොළට කෙරෙන සැපයුම් සඳහා බාධා මතුව ඇති බව ඔවුන් පවසයි.
තමන් මේ සම්බන්ධයෙන් පසුගිය දෙසැම්බර් 22 වනදා ද කරුණු පැහැදිලි කරමින් නිවේදනයක් නිකුත්කළ බව වාණිජ මණ්ඩල එකමුතුව පැවසීය.
එම එකමුතුව සිය නවතම නිවේදනයෙන් රජයෙන් ප්‍රධාන ඉල්ලීම් තුනක් කරයි.
01. වෙළෙඳපොළ අවශ්‍යතාව මත මිල තීරණය වන ක්‍රමවේදයක් ඉන්ධන, ගෑස් සහ විදුලිය සඳහා හඳුන්වාදීම. එසේම විනිමය අනුපාතය ද නිදහසේ සංසරණය වීමට ඉඩ සැලසිය යුතුය. අත්‍යවශ්‍ය භාණ්ඩවල මිල ඉහළයෑම මනා ලෙස කළමනාකරණය කිරීම ඔස්සේ වෙළෙඳපොළේ මතුව ඇති භාණ්ඩ හිඟය සහ විනිමය හිඟය පාලනය කර ගත හැකිවෙතැයි ඔවුන් පවසයි.
02. හැකි ඉක්මනින් විදෙස් ණය නැවත ප්‍රතිව්‍යුහගත කිරීම සඳහා හැකි ඉක්මනින් ක්‍රමවේදයක් ආරම්භ කිරීම. එය වාණිජ සහ වාණිජ නොවන ණය සඳහා ක්‍රියාත්මක කළ යුතුය. එමගින් ආනයන සඳහා ඩොලර් ඉතිරි කර ගැනීමට යම් ඉඩක් නිර්මාණය වෙයි.
03. හැකි ඉක්මනින් ජාත්‍යන්තර මූල්‍ය අරමුදලේ සහාය ලබා ගැනීම. එමගින් වෙළෙඳපොළ සහ පෞද්ගලික අංශයේ විශ්වාසය ඇතිවීම.
