ඉදිරි මාස හය සඳහා රටට අවශ්ය ඖෂධ පිළිබඳ පූර්ණ වාර්තාවක් හෙට (ජන. 12) දින වන විට ලබා දෙන ලෙස සෞඛ්ය අමාත්ය ආචාර්ය කෙහෙළිය රඹුක්වැල්ල මහතා සෞඛ්ය ක්ෂේත්රයේ නිලධාරීන්ට උපදෙස් ලබා දී තිබේ.
මෙම වර්ෂය තුළ මෙරටට අවශ්ය ඖෂධ සැපයුම සම්බන්ධයෙන් ඊයේ (ජන. 11) සෞඛ්ය අමාත්යංශයේ පැවති විශේෂ සාකච්ඡාවකදී අමාත්යවරයා මෙම උපදෙස් ලබා දී ඇත.
ඒ අනුව, මාස තුන බැගින් වන කාර්තු දෙකකට අවශ්ය ඖෂධ පිළිබඳ ගණනය කරමින් මෙම වාර්තාව සකස් විය යුතු බව අමාත්යවරයා මෙහිදී අවධාරණය කර තිබේ.
ඖෂධ නිෂ්පාදන, සැපයුම් හා නියාමනය පිළිබඳ රාජ්ය අමාත්ය මහාචාර්ය චන්න ජයසුමන මහතා ද මෙම සාකච්ඡාවට සහභාගී වී තිබේ.
එහිදී අමාත්යවරයා පෙන්වා දී ඇත්තේ, ගෝලීය වසංගතය තුළ කුමන බාධා පැමිණිය ද ජනතාවට අවශ්ය ඖෂධ, හිඟයකින් තොරව ලබා දිය යුතු බව ත් ඒ සඳහා රජය ප්රමුඛතාවයකින් කටයුතු කරන බව ත් ය.
මෙරටට ඖෂධ ආනයනය කරනු රටවල්වල එම ඖෂධ පිළිබඳ තොරතුරු ද රට තුළ නිෂ්පාදනය කරන ඖෂධ සම්බන්ධයෙන් ද අදාළ තොරතුරු ලබා දෙන ලෙස සෞඛ්ය අමාත්යවරයා විසින් ඖෂධ නිෂ්පාදන, සැපයුම් හා නියාමනය පිළබඳ රාජ්ය අමාත්යංශයේ ලේකම් වෛද්ය සමන් රත්නායක මහතාට මෙහිදී උපදෙස් ලබා දී තිබේ.
කොවිඩ් මර්දනයට ඉහළ ප්රමුඛතාව ලබා දුන් සේ රජය ජනතාවට අවශ්ය ඖෂධ වෙනුවෙන් ද උපරිම සාධනීය පියවර ගන්නා බව සෞඛ්ය අමාත්යවරයා මෙහිදී පෙන්වා දී ඇත.
රට තුළ ඇතැම් ඖෂධ විශාල වශයෙන් නිෂ්පාදනය කෙරෙන නමුත් ජනතාව විවිධ සන්නාම යටතේ නිකුත් කෙරෙන ඖෂධ සඳහා හුරුවී තිබීම හේතුවෙන් එම වර්ගයේ ම විවිධ සන්නාමයන්හි ඖෂධ ආනයනය කිරීමට සිදු වන බව එම සාකච්ඡාවේදී අනාවරණය වී තිබේ.
රට තුළ කිසිදු අයුරකින් කිසිදු මෙහොතක ඖෂධ හිඟයක් ඇති නොවීමට සෑම වර්ෂයේ ම එළඹෙන වර්ෂයට පෙර ඒ පිළිබඳව පූර්ව අධ්යයනයකින් කටයුතු කිරීම ඉතා වැදගත් යැයි ද සෞඛ්ය අමාත්යවරයා මහතා මෙහිදී ප්රකාශ කර ඇත.
