හෙම්මාතගම මාඔයේ තඹවිට පාලමේ පාදම ආසන්නයෙන් අනවසරයෙන් රාත්‍රී කාලයේ වැලි ජාවාරමේ නිරත වන පිරිසක් පිළිබද තොරතුරු වාර්තා වී තිබුණා.
මෙලෙස රාත්‍රී කාලයේ පටවනු ලබන වැලි දිවා කාලයේදී හෙම්මාතගම පොලීසියේ මාර්ග බාධක ඔස්සේ ජාවාරම්කරුවන් රැගෙන යන අතර පොලීසියෙන් ඊට කිසිදු බාධාවක් සිදු නොකරන බවයි අප වාර්තාකරු පැවසූවේ.
පැරණි තඹවිට පාලම අසලින්ම වැලි ගොඩ දැමිම නිසා පාලම රඳවා ඇති කොන්ක්‍රීට් කනුවල පාදම මතුවෙමින් පවතින බවත් මේ හේතුවෙන් පාලම කඩා වැටීමේ අවදානමකට ලක්ව ඇති බවත් වාර්තා වනවා.
එසේ සිදු වුවහොත් මෙම මාර්ගය භාවිතා කරන පවුල් දහස් ගනනක් ජනතාව දැඩි දුෂ්කරතාවයට පත්වනු ඇති බවයි අප වාර්තාකරු සඳහන් කළේ.
මෙම ජාවාරම්කරුවන් මාඔයේ වැලි ජාවාරම ජයටම කරගෙන යනු ලබන අතර ඔහුට ඇති බිය නිසා ප්‍රදේශවාසීන් නිහඬව සිටින බව වාර්තා වනවා.
පොලිස් සහය ජාවාරම්කරුවන්ට?
මේ පිළිබඳ පොලීසියට දැනුම් දුන්නද කිසිදු ක්‍රියාමාර්ගයක් නොගන්නා බැවින් මෙම ජාවාරම ජයටම කරගෙන යන බවද ප්‍රදේශවාසීන් චෝදනා කරනවා.
මේ අතර අනවසර දැව ප්‍රවාහනය කිරිම්ද දිගින් දිගටම සිදු වෙමින් පවතින බවයි වාර්ත වන්නේ.
පසුගිය 02 වනදා රාත්‍රියේ මහෝගනි වර්ගයේ දැව තොගයක් රැගෙන ගොස් ප්‍රදේශයේ ලියාපදිංචි ලී මෝලකට විකුනා තිබියදී වන සංරක්ෂන දෙපාර්තමේන්තුවේ අඩවිවන නිලධාරින් පැමිණ දැව තොගය අත් අඩංගුවට ගෙන තිබූ බවයි වාර්තා වන්නේ.
ඉදිරි දිනකදි ඊට නඩු පවරන බවද අඩවිවන නිලධාරින් ප්‍රකාශ කළා.
මෙම ජාවාරම්කරුගේ ක්‍රියාවන් නිසා හෙම්මාතගම, ගෝනාවල හරහා ගම්පොල මාර්ගයේ සිදුවන පරිසර හානිය වලක්වා ගැනීමට පොලීසියේත්, ප්‍රාදේශීය ලේකම්වරයාගේත් අවධානය යොමුවිය යුතුව ඇත.
ජී.ඒ.යූ.පී.සාලිය කෑගල්ල
