“පුළුවන්නම් ඡන්දයක් තියන්න : තුනෙන් දෙක පෙන්නන්නම්” – මුරුත්තෙට්ටුවේ හිමිගෙන් ආණ්ඩුවට අභියෝගයක්

පූජ්‍ය මුරුත්තෙට්ටුවේ ආනන්ද හිමියන් ජනපතිවරයා ඇතුළු ආණ්ඩුවට අභියෝගයක් කරනවා.

ඒ පුළුවන්නම් ඡන්දයක් පවත්වන ලෙසයි.

වසංගතය අස්සෙ හරි කමක් නැහැ

තිබෙන වසංගත තත්ත්වය හමුවේ වුව හැකිනම් ඡන්දයක් පවත්වන ලෙසත් උන්වහන්සේ ආණ්ඩුවට අභියෝග කරනවා.

එවිට මේ ආණ්ඩුවට දැන් තිබෙන්නේ තුනෙන් දෙක නොව තුනෙන් කීයදැයි බලා ගැනීමට හැකිවනු ඇති බවයි උන්වහන්සේ පෙන්වා දෙන්නේ.

දැන් සැපද අපිට මතකයි

අග්‍රාමාත්‍ය මහින්ද රාජපක්ෂ මහතා විපක්ෂයේ සිටියදී අල කොහොමද , ගෑස් කොහොමද , දැන් සැපද කියා ජනතාවගෙන් ඇසූ හැටි මතක් කර දෙන උන්වහන්සේ දැන් තමන් වහන්සේලාගේ ගෑස් ආණ්ඩුවට පෙන්වීමට කාලය පැමිණ ඇති බවයි සඳහන් කරන්නේ.

රාජ්‍ය පාලකයින් තමන් වහන්සේලා කියන කිසිම දෙයක් තුට්ටුවකට මායිම් නොකරන බවයි යළිත් වතාවක් උන්වහන්සේ සඳහන් කරන්නේ.

හැත්තෑවේ ආණ්ඩුවට උන දේ

මේ බලයට ගෙනාවේ මොක්කුන් දැයි තමන් වහන්සේලාගේ කීමට මේ ආණ්ඩුවට ඡන්දය දුන් ජනතාව දැන් තමන් වහන්සේලාගෙන් ප්‍රශ්න කරණ බවද මතක් කර දුන්නේ 1977 දී බණ්ඩාරනායක මැතිනියගේ ආණ්ඩුව ආසන 8 ට බැස්ස හැටිද පෙන්වා දෙමින්.

එදා මැතිනියගේ ආණ්ඩුවද මහජන මතයට කන් නොදුන් නිසා ජනතාව ජේ.ආර්. ජයවර්ධන මහතාට දුන් ජනවරමද උන්වහන්සේ මතක් කර දෙනවා.

හෙද සංගමයේද සභාපතිවරයා වන පූජ්‍ය මුරුත්තෙට්ටුවේ ආනන්ද හිමියන් මෙම මතභේදාත්මක අදහස් පළ කළේ උන්වහන්සේ වැඩ සිටින නාරාහේන්පිට අභයාරාමයේ මාධ්‍ය සාකච්ඡාවක් තබමින්.

පූජ්‍ය මුරුත්තෙට්ටුවේ ආනන්ද හිමියන් 2015 ජනපතිවරණ පරාජයෙන් පසු මහින්ද රාජපක්ෂ මහතාට යළි සිය දේශපාලන ගමන ආරම්භ කිරීමට සිය විහාරස්ථානයද ලබාදෙමින් වර්තමාන ආණ්ඩුව බලයට ගෙන ඒම සඳහා ඇප කැප වී කටයුතු කළ භික්ෂුවක්