බසයක් එන තෙක් මග බලා සිටි වයස අවුරුදු 15ක දැරියක් යතුරුපැදියෙන් රැගෙන ගොස් බරපතළ අපයෝජනය කළැයි කියන කුලියාපිටිය ශික්ෂණ රෝහලේ කනිටු සේවකයකු අත්අඩංගුවට ගැනීමට කුලියාපිටිය පොලිසියට හැකිව තිබිණි.
එසේ තමන් යතුරුපැදියේ නංවාගෙන ගොස් ප්‍රධාන මාර්ගය මගහැර අතුරු මාර්ග ඔස්සේ රැගෙන ගොස් කිහිප වරක් අපයෝජනයට උත්සාහ කළ බවත්, අස්සැද්දුම පාසල අසල අතුරු මාර්ගයේ ගසක් යටට බලහත්කාරයෙන් රැගෙන ගොස් බරපතළ ලෙස අපයෝජනය ලක් කළ බවත් දැරිය විසින් සිය මවට පැවසීමෙන් පසුව මව හා දැරිය පැමිණ කුලියාපිටිය පොලිසියට පෙරේදා (11දා) පැමිණිලි කර තිබිණි.
එසේ අත්අඩංගුවට ගෙන තිබුණේ කුලියාපිටිය වැවගම ප්‍රදේශයේ සැකකරුවකු වූ අතර දැරිය එදිනම සිය ලොකු අම්මාගේ සුවදුක් විමසීමට ගොස් යළිත් සිය නිවසට පැමිණීමට බසයක් පැමිණෙන තුරු සිටියදී සැකකරු විසින් තමන් සේවයට යන බව පවසා යතුරුපැදියේ නංවාගෙන පැමිණ තිබූ බව මූලික පොලිස් විමර්ශනවලදී හෙළිව තිබිණි.
සැකකරුද දැරිය පුද්ගලිකව දන්නා හඳුනන අයකු නිසා එසේ යතුරුපැදියට ගොඩවූ බවද. දැරිය පොලිසියට සඳහන් කර තිබූ අතර වැවගම මාර්ගයේ බසයක් පැමිණෙන තෙක් තමන් පැය කිහිපයක් මාර්ගයේ රැඳී සිටි බවද පවසා තිබිණි.
සැකකරු සම්බන්ධව පොලිසියට පැමිණිල්ල ලැබීමත් සමගම වහා ක්‍රියාත්මක වූ පොලිස් අපරාධ විමර්ශන ඒකකයේ ස්ථානාධිපති ප්‍රධාන පොලිස් පරීක්ෂක කමල් රත්නායක සැකකරු ශික්ෂණ රෝහලේ සේවය කරමින් සිටියදීම රෝහල් බලධරයන් දැනුම්වත් කිරීමෙන් අනතුරුව අත්අඩංගුවට ගෙන තිබිණි.
උපුට්ගැනීම – අරුණ
