ඉන්දීය ගුවන් හමුදාව සඳහා Rafale බහුකාර්ය ප්රහාරක ජෙට් යානා 114 ක් ලබාගැනීමේ දැවැන්ත රාජ්ය තාන්ත්රික ගිවිසුම සඳහා වූ සවිස්තරාත්මක තාක්ෂණික සහ වාණිජ යෝජනාව ප්රංශය විසින් ඉන්දියාවට ඉදිරිපත් කර තිබෙනවා.
ANI පුවත් සේවය උපුටා දක්වමින් බ්ලූම්බර්ග් පුවත් සේවය වාර්තා කර ඇති පරිදි, මෙම දැවැන්ත ආරක්ෂක ගිවිසුමේ සමස්ත වටිනාකම ඉන්දීය රුපියල් ට්රිලියන 3.25 ක් හෙවත් ඇමෙරිකානු ඩොලර් බිලියන 34 ක් පමණ වන අතර, මෙය ඉන්දියාවේ ආරක්ෂක ක්ෂේත්රයේ සිදුකෙරෙන විශාලතම මිලදී ගැනීම්වලින් එකක් ලෙස සලකනවා.
ප්රංශය ඉදිරිපත් කළ මෙම යෝජනාවේ ප්රධානතම ලක්ෂණය වන්නේ විශාල වශයෙන් දේශීය නිෂ්පාදන කටයුතුවලට ඉඩ සලසා තිබීමයි.
ඒ අනුව මිලදී ගැනීමට යෝජිත යානා 114 න් යානා 94 ක්ම ඉන්දියාව තුළම නිෂ්පාදනය කිරීමට නියමිත අතර, ඊට ප්රංශයේ Dassault Aviation සමාගම සමඟ ටාටා සහ ලාසන් ඇන්ඩ් ටූබ්රෝ වැනි ඉන්දීය දේශීය පාර්ශ්වකරුවන් එකතු වනවා.
තවද ඉන්දියාව විසින් නිපදවන ලද අස්ට්රා (Astra) වැනි ගුවනින් ගුවනට විදින මිසයිල සහ වෙනත් දේශීය තාක්ෂණයන් මෙම යානාවලට අන්තර්ගත කිරීමට ද සැලසුම් කර තිබෙනවා.
මෙම දැවැන්ත ව්යාපෘතිය හරහා ඉන්දීය දේශීය ආරක්ෂක නිෂ්පාදන කර්මාන්තයට රුපියල් ලක්ෂ කෝටි 1.6 ක පමණ දැවැන්ත ව්යාපාරික අවස්ථා උදාවනු ඇතැයි ගණන් බලා තිබෙනවා.
පැරණි මිග් ප්රහාරක යානා සේවයෙන් ඉවත් කිරීම සහ දේශීය ප්රහාරක යානා නිෂ්පාදනයේ සිදුවූ ප්රමාදයන් හමුවේ ඉන්දීය ගුවන් හමුදාවේ ප්රහාරක බලඝණ සංඛ්යාව පහත වැටී ඇති අතර, එම හිඩැස පියවීම සඳහා මෙම අතිනවීන Rafale යානා මිලදී ගැනීම අතිශය තීරණාත්මක වනවා.
ඉන්දියාව දැනටමත් ගුවන් හමුදාව සහ නාවික හමුදාව සඳහා Rafale යානා 62 ක් ඇණවුම් කර ඇති අතර, මෙම නව ඇණවුමත් සමඟ ඉන්දියාව සතුව ඇති සමස්ත Rafaleයානා සංඛ්යාව 176 දක්වා ඉහළ යනවා.
