ළමා ආරක්ෂාව සම්බන්ධයෙන් සිය සමාජ මාධ්‍ය තුළින් සිදුවූ හානි පිළිබඳව ප්‍රමාණවත් අනතුරු ඇඟවීම් ලබා නොදුන් බවට තීරණය කරමින් Meta සමාගමට දඩ පැනවීමට ඇමරිකාවේ අධිකරණයක් කටයුතු කර තිබෙනවා.
ඇමරිකාවේ නිව් මෙක්සිකෝ ප්‍රාන්ත අධිකරණයක් මගින් Meta සමාගමට ඩොලර් මිලියන 567ක දඩ මුදලක් පැනවීමට කටයුතු කර ඇති බවයි විදෙස් මාධ්‍ය වාර්තා කරන්නේ.
මෙය ළමා ආරක්ෂාව සම්බන්ධයෙන් Meta සමාගමට එරෙහිව මෙතෙක් නියම වූ විශාලතම දඩ මුදල වනවා.
එම සමාගමට මීට පෙර නියම කළ ඩොලර් මිලියන 375ක දඩය ද සමඟ එකතුව, සමාගම විසින් ගෙවිය යුතු සම්පූර්ණ දඩ මුදල ඩොලර් මිලියන 942ක් දක්වා ඉහළ ගොස් තිබෙනවා.
නිව් මෙක්සිකෝ අධිකරණ විනිසුරු බ්‍රයන් බීඩ්ෂයිඩ් සඳහන් කර ඇත්තේ, Meta සමාගම “මහජනයට කරදරකාරී බලපෑමක්” ඇති කරන ආයතනයක් බවත්, එය වායු දූෂණය සිදු කරන කර්මාන්ත ශාලාවකට සමාන කළ හැකි බවයි.
මේ අතර ඉන්ස්ටග්‍රෑම්, ෆේස්බුක්, වට්ස්ඇප් සහ ත්‍රෙඩ් හිමිකාරීත්වය දරණ සහ ක්‍රියාත්මක කරන Meta සමාගමේ ප්‍රකාශකයෙකු බ්‍රහස්පතින්දා පැවසුවේ, මෙම තීන්දුවට එකඟ නොවන අතර අභියාචනයක් ඉදිරිපත් කිරීමට කටයුතු කරන බවයි.
