ඉන්දියාවේ සාගර කලාපීය ආරක්ෂාව සහ නාවික බලය ඉහළ නැංවීමේ අරමුණින්, දේශීයව සැලසුම් කර නිෂ්පාදනය කරන ලද නවීනතම නාවික යාත්රා ත්රිත්වයක් ඉන්දීය නාවික හමුදා සේවයට එක් කිරීමට අග්රාමාත්ය නරේන්ද්ර මෝදි පියවර ගෙන තිබෙනවා.
පසුගිය 21 වැනිදා කොල්කටා නුවර ශ්යාමා ප්රසාද් මුඛර්ජි වරායේ පැවැති විශේෂ උත්සවයකදී මෙම යාත්රා නිල වශයෙන් නාවික හමුදා මෙහෙයුම් සඳහා එක් කෙරුණා.
මෙලෙස නාවික හමුදාවට එක් කරන ලද යාත්රා ත්රිත්වය වන්නේ:
- INS Dunagiri – නවීනතම රේඩාර් මඟහැරීමේ තාක්ෂණයෙන් යුත් ස්ටෙල්ත් ෆ්රිගේට් (Stealth Frigate) යුද නැවකි.
- INS Sanshodhak – සාගර කලාපීය සිතියම්ගත කිරීම් සිදු කරන මහා පරිමාණ ජලවිද්යාත්මක සමීක්ෂණ නෞකාවකි (Hydrographic Survey Vessel).
- INS Agray – සතුරු සබ්මැරීන නාශක නොගැඹුරු මුහුදු සටන් යාත්රාවකි (Anti-Submarine Warfare Shallow Water Craft).
මෙම යාත්රා ත්රිත්වයෙහි අන්තර්ගත උපාංග සහ තාක්ෂණයෙන් සියයට 75කට වඩා වැඩි ප්රමාණයක් ඉන්දියාව තුළම නිපදවා ඇති අතර, එය අග්රාමාත්ය මෝදිගේ ස්වයංපෝෂිත ආරක්ෂක නිෂ්පාදන දැක්ම මනාව පිළිබිඹු කරයි.
උත්සවය අමතමින් අග්රාමාත්යවරයා කියා සිටියේ, ඉන්දියාව තවදුරටත් ගෝලීය ආරක්ෂක වෙළෙඳපොළේ මිලදී ගන්නෙකු පමණක් වීමට අදහස් නොකරන බවත්, තීරණාත්මක බලවතෙකු වීමට නම් දේශීය නිෂ්පාදකයා බවට පත්විය යුතු බවයි.
නැව් තැනීමේ ක්ෂේත්රය රටේ ආර්ථිකයේ ප්රධාන එන්ජිමක් බව පෙන්වා දුන් මෝදි මහතා, මෙම යාත්රා නිෂ්පාදනය සඳහා ඉන්දියාවේ සුළු හා මධ්ය පරිමාණ ව්යවසායකයන් (MSMEs) 200කට අධික සංඛ්යාවක් දායක වී ඇති බව පැවසීය. මේ හරහා රට තුළ විශාල රැකියා ප්රමාණයක් සහ සැපයුම් දාම ජාලයක් බිහි වී තිබෙනවා.
2014 වසරේදී ඉන්දියාවේ ආරක්ෂක නිෂ්පාදන වටිනාකම රුපියල් කෝටි 40,000ක්ව පැවති අතර, පැහැදිලි ප්රතිපත්තිමය ප්රතිසංස්කරණ හේතුවෙන් වර්තමානය වන විට එය රුපියල් කෝටි ලක්ෂ 1.8ක් දක්වා දැවැන්ත වර්ධනයක් අත්කරගෙන තිබෙනවා.
මෑත වසරවලදී දේශීයව නිපදවූ යුද නැව් සහ සබ්මැරීන 40කට අධික සංඛ්යාවක් ඉන්දීය නාවික හමුදාවට එක් කර ඇති අතර, තවත් ප්රධාන නාවික යාත්රා 45ක් මේ වන විට නිෂ්පාදනය වෙමින් පවතිනවා.
මෙමඟින් නැඟී එන භූ-දේශපාලනික අභියෝග හමුවේ ඉන්දියාවේ වෙරළ තීරයේ ආරක්ෂාව තවදුරටත් තහවුරු වනවා.
