උපරිමාධිකරණ විනිසුරුවරුන් විශ්රාම ගැන්වීමේ වයස් සීමාව ඉහල නැංවීමට ආණ්ඩුව දරණ ප්රයත්නයක් පිළිබඳව මේ දිනවල සමාජය තුළ බරපතළ සංවාදයක් මතුව තිබෙන බව සමඟි ජන බලවේගය පවසනවා.
මෙවන් මොහොතක මෙවැනි තීරණයක් ගැනීමට ඇති අවශ්යතාව ආණ්ඩුව විසින් කිසිදු පැහැදිලි කිරීමක් හෝ සිදු නොකිරීම බරපතළ සැකයකට තුඩු දෙන කරුණක් බවයි සමඟි ජන බලවේගය විසින් නිකුත් කළ මාධ්ය නිවේදනයක සඳහන් වුණේ.
මෙම පිළිබඳව වහාම කරුණු පැහැදිලි කිරීම ජනාධිපතිවරයා සහ අධිකරණ අමාත්යවරයා සතු වගකීමක් සහ වගවීමක් බවට ද සමඟි ජන බලවේගය අවධාරණය කරනවා.
උපරිමාධිකරණ විනිසුරුතුමන්ලාගේ විශ්රාම ගැනීමේ වයස් සීමාව ආණ්ඩුක්රම ව්යවස්ථාවෙන් නියම කරන ලද්දක් බව සමඟි ජන බලවේගයේ නිවේදනයේ සඳහන්.
එහි වෙනසක් හෝ සංශෝධනයක් සිදු කළ හැක්කේ ආණ්ඩුක්රම ව්යවස්ථාවට කරනු ලබන සංශෝධනයකින් පමණ බව ජනාධිපතිවරයා ප්රමුඛ ආණ්ඩුව නොදැන සිටීම පුදුමයට කරුණක් බවද සමගි ජන බලවේගය මාධ්ය නිවේදනය මඟින් පෙන්වා දී තිබෙනවා.
වර්තමාන ආණ්ඩුව බලය ලබා ගැනීමට ඉදිරිපත් කළ ප්රතිපත්ති ප්රකාශයේ එකසිය අනූ හතර වැනි (194) පිටුවේ පැහැදිලිව ම සඳහන් කර ඇත්තේ නව ආණ්ඩුක්රම ව්යවස්ථාවක් කෙටුම්පත් කරනු ලබන අතර එය මහජනතාවට ඉදිරිපත් කර ජනමත විචාරණයකින් ද සම්මත කර ගන්නා බව යි. ආණ්ඩුක්රම ව්යවස්ථාවට විටින් විට කරනු ලබන සංශෝධන වලට එරෙහිව අතීතයේ දී වැඩි ම හඬක් නැගූයේ ද වර්තමාන ආණ්ඩුවේ ප්රධාන පාර්ශ්ව කරුවා වන ජනතා විමුක්ති පෙරමුණේ මන්ත්රීවරුන් විසින් න්ය.
බලය ලබා ගැනීම සඳහා විවේචන, විරුද්ධ වීම සහ ජනතා පෙළගැස්වීම් සිදු කළ වර්තමාන පාලකයින් යළියළිත් පෙන්වා දෙන්නේ ඔවුන් සිදු කළ ප්රකාශ හා ක්රියාවට නංවන වැඩපිළිවෙල අතර බරපතළ පරස්පරයක් ඇති බව යි.
මෙම යෝජනාව තුළ ආණ්ඩුව පැහැදිලිව ම ආණ්ඩුක්රම ව්යවස්ථාව උල්ලංඝනය කරනු ලබන අතර නීති පද්ධතියේ අඛණ්ඩතාව, නීතියේ ආධිපත්ය සහ අධිකරණයේ ස්වාධීනත්වයට සෘජු බලපෑමක් සිදු කරනු ලැබේ.
මෙවැනි සංශෝධනයක් තුළින් ආණ්ඩුව බලාපොරොත්තු වන්නේ කුමක්ද ? වර්තමානයේ අධිකරණ තුළ කටයුතු කරන ගරු විනිසුරුතුමන්ලා අනුප්රාප්තිකයින් ලෙස කටයුතු කිරීමට සුදුස්සන් නොවන බව ද ? නැතහොත් යම් ඉලක්කගත පුද්ගලයකුට හෝ කිහිප දෙනකුගේ අවශ්යතාවන් ඉටු කොට ඒ තුළින් අධිකරණයට වක්ර බලපෑමක් සිදු කිරීම ද ? මෙම ප්රශ්න සමාජය තුළ කථිකාවට ලක්ව ඇති සාධාරණ කරුණු වේ.
