ඉන්දියාවේදී ශ්රී ලාංකිකයෙක් අත්අඩංගුවට ගෙන දරුණු ලෙස පහරදීමේ සිදුවීම ධීවර, ජලජ හා සාගර සම්පත් අමාත්ය රාමලිංගම් චන්ද්රසේකර් දැඩි ලෙස හෙළා දැක තිබෙනවා.
මෙය බරපතල ලෙස මානව හිමිකම් උල්ලංඝනය කිරීමක් බවත්, අසල්වැසි රටවල් අතර පවතින අන්යෝන්ය ගෞරවයට හා විශ්වාසයට ඉන් දැඩි බලපෑමක් එල්ල වන බවත් අමාත්යවරයා අවධාරණය කර තිබෙනවා.
ඕනෑම රටක මූලික වගකීමක් වන්නේ මහජනතාවගේ ආරක්ෂාව සහ ගෞරවය තහවුරු කිරීම බව පෙන්වා දුන් අමාත්යවරයා, මෙම අමානුෂික ක්රියාව කිසිසේත් අනුමත කළ නොහැකි බව ප්රකාශ කළා.
අමාත්යවරයා මෙහිදී වැඩිදුරටත් අදහස් දක්වමින් සඳහන් කළේ, ඉන්දීය ධීවරයින් දිගු කලක් තිස්සේ ශ්රී ලංකා මුහුදු සීමාව උල්ලංඝනය කරමින් නීති විරෝධී ධීවර කටයුතුවල නිරත වුවද, ශ්රී ලාංකික ධීවරයින් බොහෝ අවස්ථාවලදී ඔවුන් දෙස සහෝදරත්වයේ හැඟීමකින් බලා සාමකාමීව කටයුතු කළ බවයි.
කෙසේ වෙතත්, ඉන්දීය ධීවරයන්ගේ අක්රමවත් ධීවර පිළිවෙත් හේතුවෙන් ශ්රී ලංකාවේ සමුද්ර සම්පත් කොල්ලකෑමට ලක්ව ඇති බවත්, එමගින් මෙරට සමුද්ර පරිසරයට සහ දේශීය ධීවරයාගේ ජීවනෝපායට බරපතල හානි සිදුව ඇති බවත් ඔහු පෙන්වා දුන්නා.
මෙම ගැටළු නිරාකරණය කර ගැනීම සඳහා ඉන්දීය උසස් නිලධාරීන් සහ ධීවර බලධාරීන් සමඟ මට්ටම් කිහිපයකින් සාකච්ඡා පවත්වා ඇති බව අමාත්යවරයා සඳහන් කළේය. නීති විරෝධී ධීවර කටයුතු වැළැක්වීම සඳහා දෙරට අතර ඒකාබද්ධ වැඩපිළිවෙළක් සහ ශක්තිමත් සහයෝගීතාවයක අවශ්යතාවය ද මෙහිදී අවධාරණය කෙරුණා.
මෙම පහරදීම සම්බන්ධයෙන් වහාම සාධාරණ පරීක්ෂණයක් පවත්වා වරදකරුවන්ට එරෙහිව නීතිමය පියවර ගත යුතු බව අමාත්ය රාමලිංගම් චන්ද්රසේකර් බලධාරීන්ගෙන් ඉල්ලා සිටිනවා.
මෙවැනි අවාසනාවන්ත සිදුවීම් නැවත ඇති නොවන බව සහතික කළ යුතු බවත්, දෙරට අතර පවතින සියලු ගැටලු සාමකාමී සාකච්ඡා සහ අන්යෝන්ය අවබෝධයෙන් විසඳා ගැනීම රජයේ ස්ථාවරය බවත් අමාත්යවරයා වැඩිදුරටත් කියා සිටියා.
