මහා භාණ්ඩාගාරයේ ඇමරිකානු ඩොලර් මිලියන 2.5ක මුදලක් හැකර් පාර්ශ්වයක් අතට පත්වීම සිද්ධිය පිළිබඳව විවිධ පුද්ගලයින් වැරදි සහගත ප්‍රවෘත්ති නිර්මාණය කරමින් යන බව මුදල් සහ ක්‍රමසම්පාදන නියෝජ්‍යය අමාත්‍යය ආචාර්ය අනිල් ජයන්ත පවසනවා.
මහජනතාව නොමඟ යැවීමට සහ රජය අපහසුතාවයට පත් කිරීමේ අරමුණින් මෙම අසත්‍ය පුවත් නිර්මාණය කරන බවයි නියෝජ්‍ය අමාත්‍යවරයා මාධ්‍ය වෙත අදහස් දක්වමින් පැවසුවේ.
වැඩිදුරටත් අදහස් දක්වමින් නියෝජ්‍ය අමාත්‍යවරයා පැවසුවේ, මෙම වංචාව සම්බන්ධයෙන් විධිමත් පරීක්ෂණයක් ක්‍රියාත්මක වන බවත්, එහි ප්‍රතිඵලයක් ලෙස අමාත්‍යංශයේ නිලධාරීන් කිහිප දෙනෙකුට අදාළ විනය ක්‍රියාමාර්ග ගෙන ඇති බවයි.
මෙම සිදුවීම පිළිබඳව විමර්ශන ක්‍රියාත්මකවීම හේතුවෙන් ඒ සම්බන්ධයෙන් සම්පූර්ණ තොරතුරු මහජනතාව වෙත ඉදිරිපත් කළ නොහැකි බවත්, මහජනතාවට තොරතුරු ඉදිරපත් කළ හැක්කේ සිදුකරන පරීක්ෂණවලට බාධාවක් ඇති නොවෙන ආකාරයෙන් බවයි ඔහු පැවසුවේ.
