2026 වසරට අදාළ සමස්ත පාසල් නිල ඇඳුම් ප්රමාණය චීන සමූහාණ්ඩුවේ ප්රදානයක් ලෙස ලබාදීම සම්පූර්ණ කළ බවට සහතිකපත් හුවමාරු කෙරේ.
2026 වසරට අදාළව රජයේ හා රජයේ අනුමත පාසල්වල සිසුන්ට සහ පිරිවෙන්වල ශිෂ්ය භික්ෂූන් වහන්සේලා, සීල මාතාවන් ඇතුළු ගිහි සිසුනට අවශ්ය කරන සමස්ත නිල ඇඳුම් රෙදි ප්රමාණයම චීන සමූහාණ්ඩුවේ ප්රදානයක් ලෙස ලබා දීම සම්පූර්ණ කළ බවට නිල වශයෙන් දැනුම් දීමේ අවස්ථාව අද (22) අධ්යාපන අමාත්යාංශ පරිශ්රයේ දී පැවැත් වුණා.
ඒ, අධ්යාපන, උසස් අධ්යාපන සහ වෘත්තීය අධ්යාපන අමාත්ය අග්රාමාත්ය හරිනි අමරසූරියගේ ප්රධානත්වයෙන්.
එහිදී චීන සමූහාණ්ඩුවේ ප්රදානයක් ලෙස 2026 වසරේ සමස්ත පාසල් නිල ඇඳුම් අවශ්යතාව සපුරාලීම සඳහා හිමි වූ රෙදි මීටර් මිලියන 11.484ක් ලබා දී අවසන් බවට නිල වශයෙන් දැනුම් දීමේ සහතික පත්ර හුවමාරුව අග්රාමාත්යවරිය හා ශ්රී ලංකාවේ චීන තානාපති Qi Zhenhong අතර සිදු වුණා.
ඒ හරහා පාසල් නිල ඇඳුම් ප්රතිලාභය හිමිවූ සිසුන් ගණන මිලියන 4.4 කට අධිකයි.
