ලෝක කුසලාන ගමන් මාවතේ කොදෙව්වන්ට තවත් සුපිරි ජයක්

පන්දුවාර 20-20 ලෝක කුසලාන තරගාවලියේ නේපාලය සමඟ අද (15) පැවති තරගය කඩුලු 09 කින් ජයගන්නට බටහිර ඉන්දීය කොදෙව් කණ්ඩායමට හැකියාව ලැබුණා.

ඉන්දියාවේ මුම්බායි නුවර වන්කඩේ ක්‍රීඩාංගණයේ දී පැවති මෙම තරගයේ පළමුව පන්දුවට පහර දුන් නේපාලය පන්දුවාර 20 තුළ කඩුලු 08ක් දැවී ලකුණු 133ක් රැස් කළා.

දීපේන්ද්‍ර සිං අයිරි ලකුණු 58ක් රැස්කරමින් නේපාල ඉනිමේ වැඩිම ලකුණු ලාභියා බවට පත් වුණා.

පන්දු යැවීමේ දී ජේසන් හෝල්ඩර් පන්දුවාර 04 තුළ ලකුණු 27කට කඩුලු 04ක් බිඳ දමමින් නේපාල පිතිකරුවන්ට තර්ජනයක් වුණා.

අනතුරුව පිළිතුරු ඉනිම ඇරඹු කොදෙව්වන් පන්දුවාර 15යි එක් පන්දුවක් පමණක් වැයකරමින් නේපාලයෙන් හිමිවූ 134ක ඉලක්කය පසුකර ගියේ එක් කඩුල්ලක් පමණක් දැවී තිබිය දීයි.

කොදෙව්වන් ජයග්‍රහණයට මාවත සැකසූ නායක ෂායි හෝප් නොදැවී ලකුණු 61ක් සහ ෂිම්රොන් හෙට්මියර් නොදැවී ලකුණු 46ක් රැස් කළා.

ඒ, අනුව මෙම තරගය ජයගත් කොදෙව්වන් තරගවලියේ C කාණ්ඩයේ තවදුරටත් පෙරමුණ ගෙන සිටිනවා.

ඔවුන් මූලික වටයේ සහභාගී වූ තරග තුනම ජයගෙන ඇති අතර, ඔවුන් ලබාගෙන ඇති ප්‍රසාද ලකුණු සංඛ්‍යාව 06ක්.

ඒ, අනුව ඔවුන් සුපිරි 08 දෙනාගේ වටයට මේ වනවිටත් සුදුකම් ලබා සිටිනවා.