ජින්තුපිටියේ සහ වාඩියමංකඩ වෙඩි තැබීම්වල තොරතුරු රැසක් එළියට

ඊයේ (14) රාත්‍රියේ වෙරළබඩ පොලිස් වසමේ ජින්තුපිටිය ප්‍රදේශයේ දී සහ කළුතර, වාඩියමංකඩ ප්‍රදේශයේ දී වෙඩි තැබීම දෙකක් සිදුව තිබුණා.

මෙම වෙඩි තැබීමවලින් පුද්ගලයින් දෙදෙනෙක් මියගොස් ඇති බවයි පොලිසිය පැවසුවේ.

වෙරළබඩ පොලිස් වසමේ ජින්තුපිටිය ප්‍රදේශයේ දී බාබර් සාප්පුවක් තුළ සිටි පුද්ගලයින් කිහිප දෙනෙකුට නාඳුනන වෙඩික්කරුවෙකු විසින් වෙඩි තැබීමක් සිදුකර තිබූ අතර, මෙම වෙඩි තැබීමෙන් තුවාල ලැබූ පස්දෙනෙකු කොළඹ ජාතික රෝහලට ඇතුළත් කර තිබුණා.

එහිදී එක් පුද්ගලයෙක් මියගොස් තිබූ අතර, මෙලෙස මියගොස් තිබුණේ වයස අවුරුදු 20ක මන්නාරම, සිලාවතුර ප්‍රදේශයේ පදිංචිකරුවෙක්.

මෙම වෙඩි තැබීමෙන් තුවල් ලැබූ අනෙක් පුද්ගලයින් සිව්දෙනා 19, 27, සහ 28 යන වයස්වල පසුවන සිලාවතුර, ග්‍රෑන්ඩ්පාස් සහ කොටහේන යන ප්‍රදේශවල පදිංචිකරුවන් බවයි පොලිසිය පැවසුවේ.

මෙම වෙඩි තැබීම සඳහා T-56 වර්ගයේ ගිනි අවියක් භාවිත කර ඇති බවයි සිදුකළ විමර්ශනවල දී අනාවරණය වී ඇත්තේ.

මේ අතර කළුතර උතුර පොලිස් වසමේ වාඩියමංකඩ ප්‍රදේශයේ නොම්බර 01 දුම්රිය නැවතුම්පොල මාර්ගයේදී ද ඊයේ (14) රාත්‍රියේ වෙඩි තැබීමක් සිදුව තිබුණා.

මෙම වෙඩි තැබීමෙන් බරපතළ තුවාල ලැබූ පුද්ගලයෙක් නාගොඩ රෝහලට ඇතුළත් කර ප්‍රඵිකාර ලබමින් සිටියදී මිය ගියා.
මෙලෙස මියගොස් ඇත්තේ වාඩියමංකඩ ප්‍රදේශයේ පදිංචිව සිටි වයස අවුරුදු 32ක පුද්ගලයෙක්.

වෙඩි තැබීමට හේතුව මෙතෙක් අනාවරණය වී නොමැති අතර, විමර්ශන කණ්ඩායම් 03 ක් වැඩිදුර විමර්ශන සිදුකරනු ලබනවා.