බේරුවල අධ්‍යාපන කලාපයට අයත් වලතර මහා විද්‍යාලය සහ අලුත්ගම පාදාගොඩ මහා විද්‍යාලයේ සිසුන් දෙපිරිසක් අතර ඇති වූ ගැටුමකින් සිසුන් හත්දෙනෙක් රෝහල් ගතකර තිබෙනවා.
ඊයේ (05) ඇති වූ මෙම ගැටුමෙන් තුවාල ලැබූ සිසුන් කළුතර ශික්‍ෂණ රෝහලට ඇතුළත් කර ඇති බවයි තොරතුරු වාර්තා වුණේ.
මෙවර සාමාන්‍ය පෙළ විභාගය සඳහා පෙනී සිටින සිසුන් සඳහා අලුත්ගම පාදාගොඩ මහා විද්‍යාලයේ දී ඉතිහාසය විෂය සම්බන්ධයෙන් පවත්වන ලද සම්මන්ත්‍රණයකට සහභාගි වූ බේරුවල වලතර මහා විද්‍යාලයේ සිසුන් පිරිසකට මෙලෙස
පාදාගොඩ මහා විද්‍යාලයේ සිසුන් පිරිසක් පහර දුන් බවයි වලතර මහා විද්‍යාලයේ ගුරුවරුන් විසින් පැමිණිල්ලක් අලුත්ගම පොලිසිය වෙත යොමු කර තිබෙනවා.
සම්මන්ත්‍රණය අතරතුර ඇති වූ කතාබහක් දුර දිග යාමෙන් එම සම්මන්ත්‍රණය අවසන් වීමෙන් පසු පාදාගොඩ මහා විද්‍යාලයේ සිසුන් මෙසේ වලතර මහා විද්‍යාලයේ සිසුන්ට පාදාගොඩ මහ විද්‍යාලය ආසන්නයේ දී පහර දී ඇති බවයි වාර්තා වන්නේ.
මෙම පහරදීමට පාදාගොඩ ප්‍රදේශයේ වෙනත් පුද්ගලයින් ද සම්බන්ධ වී ඇති බවට තොරතුරු අනාවරණය වී තිබෙනවා.
මෙම සිද්ධිය සම්බන්ධයෙන් අලුත්ගම පොලිසිය වැඩිදුර විමර්ශන සිදුකරනු ලබනවා.
