කොළඹ සිට වැලිමඩ දක්වා ධාවනය වූ පුද්ගලික බස් රථයක් හල්දුම්මුල්ල, ඌවතැන්න ප්‍රදේශයේ දී අද (18) උදෑසන මාර්ගයේ පෙරළී ගොස් අනතුරක් සිදුව තිබෙනවා.
අනතුරින් බස් රථයේ රියදුරු ජීවිතක්ෂයට පත්ව ඇති බවයි වාර්තා වන්නේ.
ධාවනය වෙමින් තිබූ බස් රථයේ රියදුරු අසුන පිහිටි දොර එකවරම විවෘතව ඇති අතර, එම අවස්ථාවේ දී රියදුරු එම දොර වැසීමට උත්සාහ කළ අවස්ථාවේ දී රථය පාලනය කරගත නොහැකිව අසල තිබූ වේල්ලක ගැටී මාර්ගයේ පෙරළී ගොස් ඇති බවයි හල්දුම්මුල්ල පොලිසිය පැවසුවේ.
අනතුරින් බස් රථයේ රිය සහයක, වයස අවුරුදු 11 පිරිමි දරුවෙකු, කාන්තාවක් සහ තවත් පුද්ගයන් 04 දෙනෙකු තුවාල ලබා හල්දුම්මුල්ල රෝහලට ඇතුළත් කිරීමට කටයුතු කළ බවයි පොලිසිය වැඩිදුරටත් සඳහන් කළේ.
අනතුරින් මියගිය බස් රථයේ රියදුරු ඇටම්පිටිය, දෙහිවිත්ත ප්‍රදේශයේ පදිංචිව සිටි වයස අවුරුදු 49ක පුද්ගලයෙක්.
