වයස අවුරුදු 13ක බාල වයස්කාර දැරියක් දූෂණය කිරීමේ සිද්ධියක් සම්බන්ධයෙන් අවුරුදු 19ක තරුණයෙක් අත්අඩංගුවට ගෙන ඇති බව හලාවත පොලිසිය පවසනවා.
මෙලෙස අත්අඩංගුවට ගෙන ඇත්තේ හලාවත, බංගදෙණිය ප්‍රදේශයේ පදිංචිව සිටි තරුණයෙක්.
සැකකරු සහ දූෂණයට ලක්ව ඇති දැරියගේ මව එකම ආයතනයක සේවයකර සිට ඇති අතර, එහිදී සැකකාර තරුණයා සහ දැරිය අතර ප්‍රේම සම්බන්ධතාවයක් හටගෙන තිබෙනවා.
ඒ, අනුව පසුගිය සැප්තැම්බර් මස 26 වනදා දැරිය පදිංචිව සිටින කුලී නිවසේ දී සැකකරු විසින් ඇයව දූෂණය කර ඇති බවයි අනාවරණය වී ඇත්තේ.
තමන් දෙදෙනා ලිංගික සම්බන්ධතා පැවැත් වූ බව කිසියම් අයෙකුට පැවසුවහොත් ඇයව මරාදමන බවට ද සැකකරු දැරියට තර්ජනය කර ඇති බවයි වාර්තා වන්නේ.
පසුව දැරිය සහ සැකකරු අතර තිබූ ප්‍රේම සම්බන්ධතාවය නැවතී ඇති අතර, දැරිය වෙනත් තරුණයෙකු සමඟ ප්‍රේම සම්බන්ධතාවයක් ආරම්භ කර පවතවාගෙන ගොස් තිබෙනවා.
එම අවස්ථාවේ දී සැකකරු දැරියගේ නව පෙම්වතාට පවසා ඇත්තේ තමන් සහ ඇය අතර ලිංගික සම්බන්ධතාවයන් පැවති
බවයි.
මේ බව දැරියගේ පෙම්වතා ඇයගෙන් විමසා ඇති අතර, එම විමසීමෙන් අනතුරුව දැරිය තමන් පදිංචි කුලී නිවසේ කාමරයක හඬමින් සිටින විට එම නිවසේ හිමිකාරිය දැක තිබෙනවා.
එම අවස්ථාවේ කාන්තාව විසින් සිදුකරන ලද විමසීමේ දී දැරියට සිදුවී ඇති අපරාධය හෙළිවී ඇති අතර, පසුව එම කාන්තාව සිද්ධිය පිළිබඳව දැරියගේ මවට පවසා තිබෙනවා.
පසුව මව විසින් දැරිය ද සමඟ හලාවත පොලිසියේ ළමා හා කාන්තා කාර්යංශයට පැමිණ පැමිණිලි කර ඇති අතර, එම පැමිණිල්ල අනුව ක්‍රියාත්මක වූ පොලිසිය සැකකරුව අත්අඩංගුවට ගැනීමටයි කටයුතු කර ඇත්තේ.
දැරිය ඇයගේ මව භාරයේ වෛද්‍ය පරීක්ෂණයක් සදහා හලාවත මහ රෝහලට ඇතුළත් කර ඇති අතර, සැකකරු හලාවත මහේස්ත්‍රාත්වරයා වෙත ඉදිරිපත් කිරීමට නියමිතව තිබෙනවා.
