දිට්වා සුළි කුණාටුවෙන් හානියට පත් වී, ධාන්ය, බඩඉරිඟු, රටකජු සහ සෙසු බෝග වගා බිම්වල සිදු වූ හානි වෙනුවෙන් නැවත වගාකිරීම සඳහා ගොවීන් 96,847 දෙනෙකුට වන්දි ලබාදී ඇති බව කෘෂිකාර්මික හා ගොවිජන රක්ෂණ මණ්ඩලයේ සභාපති පේමසිරි ජාසිංආරච්චි පවසනවා.
මෙහිදී එක් ගොවියෙකුට හෙක්ටයාරයකට රුපියල් 150,000 බැගින් වන්දි ලබා දී ඇති බවයි සභාපතිවරයා සඳහන් කළේ.
ඒ, අනුව රුපියල් මිලියන 7,500ක මුදලක් මෙම වන්දි ගෙවීම වෙනුවෙන් වියදම්කර ඇති බව සභාපතිවරයා වැඩිදුරටත් පැවසුවා.
මේ අතර හානියට පත් මෑ, බෝංචි, කැරට්, ගෝවා, මිරිස්, කෙසෙල්, පැපොල්, අන්නාසි සහ භාග එළවළු යන භෝගවලට හෙක්ටයාරයකට රුපියල් ලක්ෂ දෙක බැගින් වන්දි ගෙවීම් සිදුකර ඇති අතර, එහිදී ගොවීන් 7,964ක් සඳහා වන්දි පිරිනමා ඇති බවත් ඔහු සඳහන් කළා.
මෙහිදී හානියට පත් හෙක්ටයාර 6,000ක් වෙනුවෙන් වන්දි ලබාදීම සිදුකර ඇති බවත්, ඒ සඳහා රුපියල් මිලියන 800ක පිරිවැයක් දරා ඇති බවත් කෘෂිකාර්මික හා ගොවිජන රක්ෂණ මණ්ඩලයේ සභාපතිවරයා සඳහන් කර සිටියා.
එමෙන්ම මේ දක්වා දිට්වා සුළි කුණාටුවෙන් හානියට පත් වගාබිම් හෙක්ටයාර් 56,000 කට අදාළව වන්දි ලබාදීම සිදුකර ඇති බවත්, එහිදී ගොවීන් 104,847 දෙනෙකු සඳහා වන්දි හිමිව තිබෙනවා.
වගා හානි වෙනුවෙන් මේ වනවිට වන්දි ලබාදීම සඳහා දරා ඇති සමස්ත පිරිවැය රුපියල් මිලියන 8,300ක් බවයි කෘෂිකාර්මික හා ගොවිජන රක්ෂණ මණ්ඩලය සඳහන් කළේ.
