ආපදාවට ලක්ව ඇති ප්‍රදේශවලට අවශ්‍ය භාණ්ඩ ප්‍රවාහනය සඳහා ගුවන් යානා දෙකක් අද (06) දිනයේ ඇමරිකා එක්සත් ජනපදය විසින් මෙරටට ලබාදීමට නියමිත බව ආපදා කළමණාකරන මධ්‍යස්ථානයේ අධ්‍යක්ෂ ජනරාල් සම්පත් කොටුවෙගොඩ පවසනවා.
ඒ, අනුව c1 30 වර්ගයේ භාණ්ඩ ප්‍රවාහන ගුවන් යනා දෙකක් ඇමරිකාව විසින් මෙම මෙහෙයුම් සඳහා ලබාදෙන බවයි අධ්‍යක්ෂ ජනරාල්වරයා අද (05) පැවති මාධ්‍ය හමුවක දී සඳහන් කළේ.
ඊට අමතරව ඇමරිකා එක්සත් ජනපදය විසින් හෙලිකොප්ටර් යානා කිහිපයක් ද ආපදා කළමනාකරණය වෙනුවෙන් මෙරටට ලබාදීමට පොරොන්දු වී ඇති බවත් අධ්‍යක්ෂ ජනරාල්වරයා වැඩිදුරටත් පැවසුවේ.
අයහපත් කාලගුණය හේතුවෙන් ආපදාවට ලක්වූ මෙරටට සහායවීමට ජාත්‍යන්තරයේ රටාව රැසක් ඉදිරිපත් වී ඇති බව සඳහන් කළ ඔහු ඒ වෙනුවෙන් එම රටවල් මෙරට සමඟ සාකච්ඡා ආරම්භ කර ඇති බවයි පැවසුවේ.
එම සාකච්ඡාවලින් අනතුරුව අවශ්‍ය උපකාරයන් එම රටවල්වලින් මෙරටට සිදුකිරීමට නියමිත බවත් අධ්‍යක්ෂ ජනරාල්වරයා සඳහන් කර සිටියා.
ප්‍රංශය, පෝලන්තය, ජර්මනිය, තුර්කිය වැනි රටවල නියෝජිතයින් ආපදා කළමණාකරන මධ්‍යස්ථානය වෙත පැමිණ එම සාකච්ඡාකර අදාළ උපකාරයන් මෙරටට වෙනුවෙන් සිදු කිරීමට සූදානමින් සිටින බව ඔහු මෙම මාධ්‍ය හමුවේදී සඳහන් කළා.
