රුපියල් එකොළොස් කෝටි තිස් හය ලක්ෂ හැත්තෑ දහසක් වටිනා ” කුෂ්” මත්ද්රව්ය තොගයක්, කොළඹ වරාය තුළ පිහිටි රාජසන්තක කරන ලද සහ අත්හැර දමා ඇති ගුදම් ගබඩාව තුළ තිබී ගුවන් තොටුපොළ රේගු නිලධාරීන් පිරිසක් විසින් ඊයේ (17) දින අත්අඩංගුවට ගෙන තිබෙනවා.
මෙම ගමන් මල්ල මෙම වසරේ ඉකුත් මාර්තු මස (17) දින උදෑසන 09.45 ට ශ්රී ලංකා ගුවන් සේවයේ යූ.එල්.- 405 දරන ගුවන් යානයෙන් තායිලන්තයේ බැංකොක් නුවර සිට කටුනායක ගුවන් තොටුපොළ වෙත පැමිණි ගුවන් මගියෙක් විසින් රැගෙන විත්, ගුවන් තොටුපොළ පැමිණීමේ පර්යන්තයේ දී අත්හැර දමා පළා ගොස් තිබූ එකක් බවයි අනාවරණය වී ඇත්තේ.
පසුව කටුනායක ගුවන් තොටුපොළ රේගු නිලධාරීන් විසින් මෙම ගමන් මල්ල ගුවන් තොටුපොළ අත්හැර දමා ඇති ගමන් මලු ගබඩාවේ තබා, ඉන්පසුව කොළඹ වරාය තුළ පිහිටි රාජසන්තක කරන ලද සහ අත්හැර දමා ඇති ගුදම වෙත මාරු කර යවා තිබෙනවා.
මාස 09 ක කාලයක් මෙම ගමන් මල්ල භාර ගැනීමට කිසිවෙකු ඉදිරිපත් නොවීම නිසා , එය විවෘතකර පරීක්ෂා කිරීමට රේගු නිලධාරීන් පියවර ගැනීමත් සමග එහි පොලිතීන් ඇසුරුම් තුළ සගවා සකස් කර තිබූ මෙම කිලෝ ග්රෑම් 11 යි ග්රෑම් 367 ක් බරැති ” කුෂ්” මත්ද්රව්ය තොගය අත්අඩංගුවට ගැනීමට සමත් වී ඇති බවයි වාර්තා වන්නේ.
මෙම මත්ද්රව්ය මේ වනවිට වැඩිදුර විමර්ශන කටයුතු සදහා කොළඹ පොලිස් මත්ද්රව්ය කාර්යාංශයේ නිලධාරීන් වෙත භාර දීමට පියවර ගෙන තිබෙනවා.
