මෙවර උසස් පෙළ විභාග අපේක්ෂකයින්ට විශේෂ නිවේදනයක්

2025 වසරේ අ.පො.ස. උසස් පෙළ ලබන නොවැම්බර් මස 10 වන දින සිට දෙසැම්බර් මස 05 වන දින දක්වා විභාග මධ්‍යස්ථාන 2362 ක දීත්, 2025 සාමාන්‍ය තොරතුරු තාක්ෂණ විභාගය දෙසැම්බර් මස 06 වන සෙනසුරාදා දින විභාග මධ්‍යස්ථාන 1665 ක දීත් පවත්වනු ලබනවා.

මෙම විභාග සඳහා වන ප්‍රවේශ පත්‍ර හා පාසල් පැමිණීමේ ලේඛන මේ වන විට අදාල පාසල අයත් කලාප අධ්‍යාපන කාර්යාලය වෙත ලබා දී ඇති අතර සියලුම විදුහල්පතිවරුන් තම පාසලට අදාළ කලාප අධ්‍යාපන කාර්යාලයේ විභාග විෂයභාර නියෝජ්‍ය/ සහකාර අධ්‍යාපන අධ්‍යක්ෂගෙන් ප්‍රවේශ පත්‍ර භාර ගත යුතු බව විභාග දෙපාර්තමේන්තුව නිවේදනයකර තිබෙනවා.

මෙවර විභාගය සඳහා පෙනී සිටින පෞද්ගලික අයදුම්කරුවන්ගේ ප්‍රවේශ පත්‍ර ඔවුන්ගේ පෞද්ගලික ලිපිනයට තැපැල් මගින් යොමු කර ඇති බවයි එම දෙපාර්තමේන්තුව පවසන්නේ.

එමෙන්ම, රජයේ පාසල් විදුහල්පතිවරුන් https://onlineexams.gov.lk/eic/ වෙබ් අඩවිය වෙත පිවිස, ඔවුන් වෙත ලබා දී ඇති පරිශීලක නාමය හා මුරපදය (School code & Password) උපයෝගී කරගෙන ගිණුමට පිවිස අදාළ ප්‍රවේශ පත්‍ර සංශෝධනය කළ යුතු බවත්, පෞද්ගලික පාසල් (සාමාන්‍ය තොරතුරු තාක්ෂණ විභාගය) https://onlineexams.gov.lk/eic/index.php/clogin/psch වෙබ් අඩවිය වෙත පිවිස, පරිශීලක නාමය හා මුරපදය (School code & Password) උපයෝගී කරගෙන අදාළ සංශෝධන සිදු කළ යුතු බවයි එම දෙපාර්තමේන්තුව පවසනවා.

විභාග දෙපාර්තමේන්තුව වැඩිදුරටත් දැනුම් දෙන්නේ, අපේක්ෂකයින්ගේ නම්, මාධ්‍ය හෝ විෂයයන්හි කිසියම් සංශෝධනයක් ඇත්නම්, එම වෙබ් අඩවිය තුළින්ම එය සිදු කළ හැකි බවයි.