බස්නාහිර පළාතේ ධාවනය කෙරෙන සියලුම පෞද්ගලික බස් රථ හෙට (01) දින සිට ධාවනයේදී ටිකට් පත් ලබාදීම සහ මගියා විසින් ටිකට්පත් ලබා ගැනීම අනිවාර්ය බව මාර්ගස්ථ මගී ප්‍රවාහන අධිකාරියේ සභාපති විශ්‍රාමික කමාන්ඩර් ගාමිණී ජාසිංහ ප්‍රකාශ කරනවා.
කොන්දොස්තරවරයා ටිකට් පතක් ලබා නොදෙන්නේ නම් ඔහුට එරෙහිව නීතිමය කටයුතු කිරීමටත් මගියා ටිකට් පත ලබා නොගන්නේ නම් ඔහුට එරෙහිව ද නීත්‍යානුකූල පියවර ගනු ලබනවා.
ඒ අනුව මගියෙක් ටිකට් පතක් ලබා නොගන්නේ නම් රුපියල් සීයක දඩයක් සහ ගමන් වාරය මෙන් දෙගුණයක් අයකර ගැනීමේ හැකියාව පවතින අතර ඔහු එම දඩ මුදල ගෙවීමට ප්‍රතික්ෂේප කරන්නේ නම් අධිකරණ ක්‍රියාවලියකට යෑමට කටයුතු කිරීමට හැකි බවයි පැවසෙන්නේ.
කොන්දොස්තරවරයා විසින් ටිකට් පත ලබා නොදෙන්නේ නම් රුපියල් 750ක දඩ මුදලක් අයකර සහ එක් දින වැඩමුළුවකට යොමු කරවීම සිදු කරනු ලබනවා.
එම පියවර ලබන මස සිට තවත් පුළුල් කර කොන්දොස්තරවරයාගේ වැඩ තාවකාලිකව තහනම් කිරීමට ද කටයුතු කරන බවයි මාර්ගස්ථ මගී ප්‍රවාහන අධිකාරියේ සභාපතිවරයා වැඩිදුරටත් සඳහන් කළේ.
හෙට දින සිට බස්නාහිර පළාත තුළ මාර්ගස්ථ පරීක්ෂකවරුන් යොදවා පරීක්ෂා කිරීම සිදු කිරීමට නියමිතයි.
