ලෝක අනුශූරයින් අසරණ කළ මැන්චෙස්ටර් පිටියේ හයේ පහර වරුසාව

සංචාරක දකුණු අප්‍රිකාව සහ එංගලන්තය අතර දෙවන විස්සයි විස්ස තරගය නිමාවට පත්වුණේ එංගලන්තය කණ්ඩායමට ලකුණු 146ක විශාල ජයග්‍රහණයක් අත්කරදෙමින්.

මැන්චෙස්ටර් පිටියේ පැවති තරගයේ කාසිය වාසිය හිමිකර ගත් දකුණු අප්‍රිකානු නායකයාගේ තීරණය මුළුමනින්ම අසාර්ථක තීරණයක් බවට පත් කරමින් තරගයේ මුල් පන්දුවේ සිටම ප්‍රහාරාත්මක පිතිහරඹයක නිරත වූ එංගලන්ත පිතිකරුවන් තම අණසක ක්‍රීඩාංගණය පුරාවටම පැතිර වූයේ විශාල හයේ පහර සහ හතරේ පහරවල් සමඟින්.

ආරම්භක පිතිකරුවන් යුගළ වූ ජෝස් බට්ලර් සහ ෆිල් සෝල්ට් විසින් ප්‍රේක්ෂකයින්ට කලකට අමතක නොවන ඉනිම් දියත් කළේ දකුණු අප්‍රිකානු පන්දුයවනන් අසරණ තත්වයකට ඇඳ දමමින්.

ප්‍රහාරාත්මක වේගය 276ක රඳවාගත් ජෝස් බට්ලර් දැවී ගියේ පන්දු 30ක් තුල වේගවත් ලකුණු 80ක් රැස් කිරීමෙන් අනතුරුවයි.

ආරම්භක සගයා දැවී ගිය පසු තම වේගවත් පිතිකරණ රිද්මය තවත් ඉහළ දමාගත් ෆිල් සෝල්ට් එංගලන්ත ඉනිමේ අවසන් පන්දුව තෙක් පිටියේ රැඳී සිටිමින් තමාගේ නම ඉදිරියෙන් වාර්තා රැසක් ලියා ගැනීමට සමත් වුණා.

එංගලන්තය වෙනුවෙන් විස්සයි විස්ස ජ්‍යාත්‍යන්තර ක්‍රිකට් පිටියේ වේගවත්ම ශතකය සහ එංගන්ත ක්‍රීඩකයෙක් විසින් විස්සයි විස්ස ජ්‍යාත්‍යන්තර තරගයක රැස් කරගත් විශාලම ලකුණු සංඛ්‍යාව සඳහා හිමිකම් කියූ ෆිල් සෝල්ට් පන්දුවාර 20 අවසන්ව පිටියෙන් ඉවත්ව යන විට නොදැවී පන්දු 60ක් තුළ වේගවත් ලකුණු 141ක් රැස් කරගෙන තිබුණා.

එමෙන්ම ඉනිමේ දෙවන කඩුල්ල බිඳ වැටීමෙන් පසු පිටියට පිවිසි නායක හැරී බෲක් ද නොදැවී පන්දු 21 ක් තුළ ලකුණු 41ක් රැස් කර ගත්තා.

ඉනිම අවසානයේ ලකුණු පුවරුව 304ට කඩුලු 02ක් ලෙස දිස් වෙද්දී එම ලකුණු පුවරුව ද වාර්තා අතරට එක්වුණේ ICC පූර්ණ සාමාජිකත්වය හිමි රටකට එරෙහිව ජ්‍යාත්‍යන්තර විස්සයි විස්ස පිටියේ කණ්ඩායමක් විසින් රැස් කළ ඉහලම ලකුණු සංඛ්‍යාව ලෙසයි.

පන්දුවාර විස්සක් තුළ ලකුණු 304ක් හඹා යෑම සඳහා පිටියට පිවිසි දකුණු අප්‍රිකානුවන්ට පන්දුවාර 16යි එක පන්දුවක් තුළ සියල්ලන් දැවී ගොස් රැස් කරගැනීමට හැකිවුණේ ලකුණු 158ක් පමණයි.

එංගලන්තය වෙනුවෙන් ලකුණු 25ක් තුළ කඩුලු 03ක් දවාගත් ජෝෆ්ර ආචර් එංගලන්තයේ ජයපැන් සාදය කඩිනම් කිරීමට සමත් වුණා.