ප්රබල මත්ද්රව්ය ජාවාරම්කරුවන් සහ අපරාධ කල්ලි සාමාජිකයින් සමඟ සිටියදී ඉන්දුනීසියාවේදී අත්අඩංගුවට ගෙන පොලිසිය භාරයේ රඳවා සිටි සංවිධානාත්මක අපරාධ කල්ලි සාමාජික බැකෝ සමන්ගේ බිරිඳ යැයි කියන මිද්දෙණියේ පදිංචි 30 හැවිරිදි සාජිකා ලක්ෂානි පත්තිනිගේ නැමැත්තිය ලබන 18 දින දක්වා රක්ෂිත බන්ධනාගාර ගත කිරීමට කොළඹ ප්රධාන මහේස්ත්රාත් අසංක එස් බෝදරගම මහතා අද (04) නියෝග කළා..
මන්දිනු පද්මසිරි හෙවත් කෙහෙල්බද්දර පද්මේ ඇතුළු අපරාධ කල්ලි සාමාජිකයින් පස්දෙනකු පසුගියදා ජකර්තා නුවරදී අත්අඩංගුවට ගත් අවස්ථාවේදී මෙම බැකෝ සමන් හෙවත් මිදෙණියේ එන්.එන් ප්රසංගගේ බිරිඳ සහ කුඩා දරුවාද අත්අඩංගුවට ගත් බවත් පසුව ඇයට රතු නිවේදනය නිකුත් කර නොමැති හෙයින් ඇය නිදහස් කර ඇති බවද පසුව ඇය පැමිණිමේදි මෙරටට අත්අඩංගුවට ගෙන දින හතක රැඳවුම් නියෝග ලබා විමර්ශන කටයුතු කළ බවද අපරාධ පරීක්ෂණ දෙපාර්තමේන්තුව අධිකරණයට කරුණු ඉදිරිපත් කරමින් සඳහන් කළා.
පසුගිය විසි නම වැනිදා ඇයව ගුවන්තොටුපළේදී අත්අඩංගුවට ගන්නා විට පවුම් හතළිහක පමණ රන් අබරණ පැළඳ සිටි බවත් විදේශ රටක සැඟව සිටි ඇය හෝ ඇගේ සැමියා කිසිදු රැකියාවක් නොකළ බවත් එතරම් රත්තරන් ප්රමාණයක් මිලදී ගැනීමට මුදල් උපයා ගත් ආකාරය අනාවරණය කිරීමට නොහැකි වීම නිසා මුදල් විශුද්ධි කරන වැළැක්වීම පරත යටතේ ඇයට එරෙහිව චෝදනා ගොනුකරන බවද විමර්ශන නිලධාරීන් අධිකරණයට වැඩිදුරටත් පෙන්වා දුන්නා.
ඇය අධිකරණයට ඉදිරිපත් කළ අවස්ථාවේදී ඇගේ තුන් හැවිරිදි දරුවාද අධිකරණයට රැගෙන ඒමට විමර්ශන නිලධාරීන් පියවර ගෙන තිබූ අතර දරුවා යමෙකු බාරයට පත් කරන්නේදැයි ප්රධාන මහේස්ත්රාත්වරයා විත්ති කූඩුවේ සිටි එම සැකකාරියෙකින් විමසා සිටියේය.
දරුවා භාරදීමට සුදුසු අයකු නොමැති බැවින් ඇය සිය දරුවාද බන්ධනාගාරයට කැඳවාගෙන යන බව එම සැකකාරය අධිකරණයට දැනුම්දුන් අතර ඒ සඳහා ඇයට අවසර දෙන ලෙස ප්රධාන මහේස්ත්රාත්වරයා බන්ධනාගාර නිලධාරීන්ට නියෝග කළා.
