අගමැති නරේන්ද්‍ර මෝදි සහ රුසියානු ජනාධිපති ව්ලැඩිමීර් පුටින් සඳුදා දීර්ඝ පෞද්ගලික සාකච්ඡාවක නිරත වූ අතර, එය SCO සමුළුවෙන් පසු පුටින්ගේ Aurus ලිමොසින් රථය තුළ සිදු වුණා.
PTI වාර්තාවලට අනුව, තමන් සමඟ පැමිණෙන ලෙස පුටින්, මෝදිට ආරාධනා කර ඇති අතර, අගමැති මෝදිට ඔහු හා එක්වීමට හැකි වන පරිදි රුසියානු නායකයා විනාඩි 10කට ආසන්න කාලයක් බලා සිටි බව ද සඳහන්.
මේ ගමන හේතුවෙන් ඔවුන්ගේ නියමිත විධිමත් ද්විපාර්ශ්වික රැස්වීමට පෙර පැයකට ආසන්න කාලයක් පෞද්ගලික සාකච්ඡා දිගටම කරගෙන යාමට අවස්ථාව ලැබුණා.
අගමැති මෝදි, ලිමොසින් රථය තුළ රුසියානු ජනාධිපතිවරයා සමඟ ගත් ඡායාරූපයක් සමාජ මාධ්‍යවල බෙදා ගනිමින්, SCO සම්මේලනයෙන් අනතුරුව ජනාධිපති පුටින් සමඟ ද්විපාර්ශ්වික හමුවට එක්ව ගමන් කළ බවත්, ඔහු සමඟ සංවාද සෑමවිටම ගැඹුරු දැක්මක් ලබාදෙන බවත් පැවසුවා.
“නායකයන් දෙදෙනා ඔවුන්ගේ කණ්ඩායම් සාමාජිකයින් සමඟ එක්වීමට නියමිතව සිටි හෝටලයට යන අතරමගදී ඔවුන්ගේ පෞද්ගලික සංවාදය දිගටම කරගෙන ගියහ. කෙසේ වෙතත්, හෝටලයට ළඟා වූ විට වුවද ඔවුන් රුසියානු ජනාධිපතිවරයාගේ ලිමොසින් රථයෙන් බැස නොගිය අතර විනාඩි 50 ක් ඔවුන්ගේ සංවාදය දිගටම කරගෙන ගියහ,” රුසියානු ජාතික ගුවන් විදුලි නාලිකාවක් වන VestiFM උපුටා දක්වමින් PTI තවදුරටත් වාර්තා කළා.
ක්‍රෙම්ලිනයේ ප්‍රකාශක දිමිත්‍රි පෙස්කොව් ද පසුව තහවුරු කළේ නායකයින් දෙදෙනා පැයක් පමණ මෝටර් රථය තුළ සංවාදයේ නිරත වූ බවයි.
ඉන්පසු පැවති විධිමත් සාකච්ඡා අතරතුර, අගමැති මෝදි පුටින්ගෙන් ඉල්ලා සිටියේ යුක්රේන ගැටුම හැකි ඉක්මනින් අවසන් කරන ලෙසයි.
කලාපයේ කල් පවතින සාමය සෙවීම මානව වර්ගයාගේ වගකීමක් ලෙස මෝදි හඳුන්වා දුන්නා.
ඉන්දියාව සහ රුසියාව අතර ශක්තිමත් සම්බන්ධතාවය අවධාරණය කළ අගමැති නරේන්ද්‍ර මෝදි, ඉතා දුෂ්කර අවස්ථාවන්හිදී පවා දෙරට සැමවිටම උරෙන් උර ගැටී සිටින බව පැවසුවා.
රුසියානු ජනාධිපති ව්ලැඩිමීර් පුටින් සමඟ පැවති ද්විපාර්ශ්වික හමුවේදී අගමැති මෝදි, ගෝලීය සාමය, ස්ථාවරත්වය සහ සමෘද්ධිය සඳහා නවදිල්ලිය සහ මොස්කව් අතර සහයෝගිතාව අත්‍යවශ්‍ය බව අවධාරණය කළා.
මෙම වසරේ දෙසැම්බර් මාසයේදී නවදිල්ලියට පැමිණීමට නියමිත රුසියානු ජනාධිපති පුටින් එනතුරු ඉන්දියානුවන් ඉතා උනන්දුවෙන් බලා සිටින බව ද අගමැති මෝදි පවසා තිබෙනවා.
මේ අතර, රුසියානු ජනාධිපති පුටින් ද රුසියානු-යුක්රේන යුද්ධය විසඳීමට ඉන්දියාව සහ චීනය දරන උත්සාහයන් අගය කර ඇතැයි පීටීඅයි වාර්තා කළා.
ඔහු යුක්රේනයේ බටහිර මිත්‍ර පාක්ෂිකයින් ද විවේචනය කළේ, ඔවුන් “කියෙව්හි කුමන්ත්‍රණයට” සහාය දුන් බවට චෝදනා කරමින්.
එය අවසානයේ යුක්රේනයේ අර්බුදයට හේතු වූ බව මෝදි සමග සාකච්ඡාවේ දී පුටින් පවසා තිබෙනවා.
