එක්සත් ජනපදයට අභියෝගයක් වන නව ගෝලීය ආරක්ෂක න්‍යාය පත්‍රයක් සඳහා වූ තම අභිලාෂය හෙළි කරමින්, කලාපීය ආරක්ෂක සංසදය නව තලයකට ගෙන යාම සඳහා චීනය ෂැංහයි සහයෝගිතා සංවිධානයේ සියලුම පාර්ශවයන් සමඟ කටයුතු කරන බව චීන ජනාධිපති ෂී ජින්පින් ප්‍රකාශ කළා.
ෂැංහයි සහයෝගිතා සංවිධානය නව ආකාරයේ ජාත්‍යන්තර සබඳතා සඳහා ආදර්ශයක් සකසා ඇති බව උතුරු චීනයේ ටියැන්ජින් හි පැවති දෙදින සමුළුවේදී ලෝක නායකයින් 20 කට වැඩි පිරිසක් අමතමින් ආරම්භක දේශනයේදී ෂී පැවසුවා.
සංසදය බාහිර මැදිහත්වීම්වලට නිසැකවම විරුද්ධ වන බවද චීන ජනාධිපතිවරයා අවධාරණය කළා.
රුසියානු ජනාධිපතිව්ලැඩිමීර් පුටින්, ඉන්දීය අගමැති නරේන්ද්‍ර මෝදි මෙන්ම මධ්‍යම ආසියාව, මැදපෙරදිග, දකුණු ආසියාව සහ අග්නිදිග ආසියාවේ අනෙකුත් නායකයින් ගෝලීය දකුණු සහයෝගීතාවයේ ප්‍රධාන සංදර්ශනයක් ලෙස සමාරම්භක උත්සවයට සහභාගී වී සිටියා.
මේ අතර ඊයේ පැවති ෂැංහයි සහයෝගිතා සංවිධානයේ (SCO) සමුළුවේ පිළිගැනීමේ උත්සවයට සමගාමීව අගමැති නරේන්ද්‍ර මෝදි ලෝක නායකයින් රැසක් හමුවූ අතර එහිදී ආරක්ෂක, වෙළඳාම, බලශක්තිය සහ සංස්කෘතිය හරහා ද්විපාර්ශ්වික සබඳතා ශක්තිමත් කිරීම පිළිබඳව සාකච්ඡා කර තිබෙනවා.
චීන ජනාධිපති ෂී ජින් පිං සහ ජනාධිපති ආර්යාව, පෙන්ග් ලියුවාන් විසින් පවත්වන ලද නිල පිළිගැනීමේ උත්සවයේදී අගමැති මෝදි ඔවුන් දෙපළ සමඟ සුබ පැතුම් හුවමාරු කරගත්තා.
රුසියානු ජනාධිපති ව්ලැඩිමීර් පුටින් ඇතුලු අග්නිදිග ආසියාවේ, මධ්‍යම ආසියාවේ සහ යුරේසියාවේ නායකයින් සමඟ අන්තර් ක්‍රියා කළ අගමැති මෝදි, විවිධ අංශවල සහයෝගීතාව පුළුල් කිරීමට ඉන්දියාවේ කැපවීම ඉස්මතු කළා.
ඔහු වියට්නාම අගමැති ෆම් මින් චින් සමඟ ඉතා ඵලදායී සංවාදයක් පැවැත්වූ අතර, ආරක්ෂක, වෙළඳාම සහ හරිත බලශක්ති ක්ෂේත්‍රයේ සහයෝගීතාව ගැඹුරු කිරීමට ඉන්දියාවේ උනන්දුව අවධාරණය කර තිබෙනවා.
නිල පිළිගැනීමේ උත්සවයේ දී ව්ලැදිමීර් පුටින් හමු වූ අගැමති මෝදි ඔහු බදා වැළඳගන්නා ඡයාරූපයක් සිය x ගිණුම ඔස්සේ බෙදා ගනිමින් පැවසුවේ හැමවිටම පුටින් ජනාධිපතිවරයා හමුවීම සතුටක් බවයි.
ඉන්දීය අගැමති නරේන්ද්‍ර මෝදි සහ රුසියානු ජනාධිපති ව්ලැඩිමීර් පුටින් අතර නිල ද්විපාර්ශ්වික හමුව අද පැවැත්වීමට නියමිතයි.
