සංචාරක දකුණු අප්‍රිකානු කණ්ඩායම සහ ඕස්ට්‍රේලියානු කණ්ඩායම අතර එක්දින තරගාවලියේ අවසන් තරගය අද (24) නිමාවට පත් වුණේ ඕස්ට්‍රේලියානුවන්ට ජය හිමිකර දෙමින්.
පෙර තරග දෙකම ජයගෙන පූර්ණ තරගාවලි ජයග්‍රහණයක් වෙනුවෙන් පිටියට පිවිසි දකුණු අප්‍රිකානුවන්ට මෙම තරගයේ දී දරුණු පරාජයකට මුහුණ දීමට සිදු වුණා.
කාසියේ වාසිය හිමිකර ගත් ඕස්ට්‍රේලියානුවන් ප්‍රථමයෙන්ම පන්දුවට පහරදීම තෝරාගත් අතර, පසුගිය තරග දෙකේදීම අසාර්ථක වූ ඕස්ට්‍රේලියානු පිතිකරණ බලඇණිය මෙම තරගයේ ආරම්භයේ සිටම තම ආධිපත්‍ය පැතිරෙව්වා.
මුල් පෙළ පිතිකරුවන් ත්‍රිත්වය වන ට්‍රැවිස් හෙඩ්, කැමරන් ග්‍රීන් සහ මිෂෙල් මාෂ්ගේ ශතකවලින් හැඩගැන්වුණු ඕස්ට්‍රේලියානු ඉනිමේ පන්දුවාර 50 අවසානයේ ලකුණු පුවරුව දිස් වූයේ කඩුලු දෙකකට ලකුණු 431ක් ලෙසයි.
ඕස්ට්‍රේලියානු කණ්ඩායමක් මව්රටේ දී ලබා ගත් ඉහළම එක්දින ලකුණු සංඛ්‍යාව ලෙස මෙම ලකුණු 431 වාර්තා පොත් අතරට එක්වුණා.
විශාල ලකුණු පුවරුවක් හඹා යාමට පිටියට පිවිසි දකුණු අප්‍රිකානුවන් සියල්ල ලකුණු 155ක් තුළ දවා ගැනීමට දඟ පන්දු යවන යොවුන් ක්‍රීඩක කූපර් කොනොලි ප්‍රමුක ඕස්ට්‍රේලියානුවන් සමත් වුණා.
අවසානයේ ලකුණු 236ක විශාල ජයග්‍රහණයක් ඕස්ට්‍රේලියාව සතු වෙද්දී තරගයේ වීරයා ලෙස ට්‍රැවිස් හෙඩ් සහ තරගාවලියේ වීරයා ලෙස කේෂව් මහරාජ් සම්මාන දිනාගත්තා.
