අද පස්වරුවේ පළාත් කිහිපයකටම තද වැසි

අද (23) දිනයේ පවතින කාලගුණ තත්ත්වය පිළිබද කාලගුණ විද්‍යා දෙපාර්තමේන්තුව විසින් නිවේදනයක් නිකුත් කර තිබෙනවා.

ඒ අනුව උතුරු, උතුරු මැද, ඌව, මධ්‍යම සහ නැගෙනහිර පළාත්වල පස්වරු 02.00න් පසුව වැසි හෝ ගිගුරුම් සහිත වැසි ඇති වීමේ හැකියාවක් පවතින අතර එම පළාත්වලම ස්ථාන කිහිපයකට මිලි ලීටර් 50ට වැඩි තරමක තද වැසි ඇති විය හැකි බවත් එම නිවේදනයේ සඳහන්.

එමෙන්ම බස්නාහිර,සබරගමුව පළාත්වලත් ගාල්ල සහ මාතර දිස්ත්‍රික්කවලත් සුළු වැසි තත්වයක් බලාපොරොත්තු වන බව කාලගුණ විද්‍යා දෙපාර්තමේන්තුව වැඩිදුරටත් පවසනවා.

වැසි තත්වයත් සමඟ ඇතිවිය හැකි තද සුළං සහ අකුණු මඟින් සිදුවන අනතුරු අවම කර ගැනීමට කටයුතු කරන ලෙස ඔවුන් ජනතාවගෙන් ඉල්ලා සිටිනවා.