ගුවන් මගියෙකු විසින් ශ්රී ලංකාව තුළට ගෙන ඒමට තැත් කළ විශාලතම රන් තොගය අද (15) දින කටුනායක ගුවන් තොටුපොළ තුළ සේවය කළ තම නිලධාරීන් විසින් අත්අඩංගුවට ගෙන ඇති බව රේගු මාධ්ය ප්රකාශක, අතිරේක රේගු අධ්යක්ෂ ජනරාල් සීවලී අරුක්ගොඩ මහතා ප්රකාශ කළා.
රුපියල් කෝටි එකසිය දහයක් වටිනා කිලෝග්රෑම් 35කට අධික බරකින් යුතු මෙම රන් තොගය මෙරටට ගෙන ඒම සඳහා, විශේෂයෙන්ම සකස් කළ, මෝටර් රථ අමතර කොටස් සේ පෙනෙන ආකාරයේ උපකරණ 09ක් තුළ සඟවා, ඒවා සිය ගමන් මල්ලේ ද සඟවා ගෙන මෙම ගුවන් මගියා කටුනායක ගුවන් තොටුපොළ වෙත පැමිණ තිබූ බවයි දසත ගුවන්තොටුපොළ වාර්තාකරු පැවසුවේ.
සැකකරු කොළඹ ග්රෑන්ඩ්පාස් ප්රදේශයේ පදිංචි 32 හැවිරිදි ව්යාපාරිකයෙක්.
සැකකරු අද උදෑසන 08.40 ට ඩුබායි සිට එමිරේට්ස් ගුවන් සේවයේ ඊ.කේ.- 650 දරන ගුවන් යානයෙන් කටුනායක ගුවන් තොටුපොළ වෙත පැමිණ සිටියා.
රන් බිස්කට් 195ක් සහ කිලෝග්රෑම් 13ක් බර ස්වර්ණාභරණ තොගයක් මෙසේ අත්අඩංගුවට ගත් රත්තරන් තොගය අතර වුණා.
මෙම වැටලීමේ ඇති සුවිශේෂීත්වය නිසා ම රේගු අධ්යක්ෂ ජනරාල් සරත් නෝනිස්, රේගු මාධ්ය ප්රකාශක සීවලී අරුක්ගොඩ මහතා ඇතුළු උසස් රේගු නිලධාරීන් පිරිසක් ද මෙම අවස්ථාව නිරීක්ෂණය කිරීමට කටුනායක ගුවන් තොටුපොළ වෙත පැමිණ තිබුණා.
ගුවන් තොටුපොළ රේගු නිලධාරීන් සැකකරුව අත්අඩංගුවේ තබාගෙන මේ පිළිබඳ වැඩිදුර විමර්ශන සිදු කරනවා.
