කටාන පොලිසියට ලද තොරතුරක් මත දෙමහල් නිවසක සූක්ෂ්ම ලෙසින් නීතිවිරෝධී මත්පැන් ස්කාගාරයක් පවත්වාගෙන ගිය පුද්ගලයෙකු අත් අඩංගුවට ගෙන තිබෙනවා.
පොලිසිය වැටලීමට යන විටදීත් එම ස්ථානයේ මත්පැන් පෙරමින් සිටි බවයි වාර්තා වන්නේ.
අත්අඩංගුවට ගත් සැකකරුගෙන් පොලිසිය ප්‍රශ්න කිරීමේ දී හෙළි වී ඇත්තේ මෙම නීති විරෝධී මත්පැන් ජාවාරම කාලයක් තිස්සේ පවත්වාගෙන ගොස් ඇති බවයි.
කෙසේ වුවත් මෙම දෙමහල් ගොඩනැගිල්ල කුලී පදනම මත මාසෙට රුපියල් 60,000කට ලබාගත් බවත් අත්අඩංගුවට ගත් සැකකරු පොලිසියට පවසා තිබෙනවා.
අත්අඩංගුවට ගත් සැකකරු මීරිගම ප්‍රදේශයේ පදිංචිකරුවෙක්.
මෙම නීතිවිරෝධී මත්පැන් මිනුවන්ගොඩ, අලුතපොළ, නිල්පනාගොඩ, කටුවැල්ලගම, හපුවලාන, මරදගහමුල යන ප්‍රදේශවලට බෙදා හැර ඇති බවත් වාර්තා වනවා.
නීතිවිරෝධී මත්පැන්වල වටිනාකම ලක්ෂ 04කට ආසන්නයි.
අත්අඩංගුවට ගත් නීතිවිරෝධී මත්පැන් බැරල් අටක් සහ ගෝඩා, දඟර, ගෑස් සිරින්ඩර් 03, වතුර මෝටරයක් සමග සැකකරු අද (04) දින මීගමුව අධිකරණයට ඉදිරිපත් කිරීම් නියමිතයි.
